Hego Euskal Herrian Lanbide-arteko Gutxieneko Soldata propioaren inguruko gogoeta sustatzeko eta haren onurez aritzeko asmoz, Ipar Hegoa eta Manu Robles-Arangiz fundazioek mintegi bat antolatu zuten maiatzaren 16ean, Bilboko Bizkaia Aretoan. 150 lagunetik gora bildu ziren bertan, eta ekarpen ugari emateko tartea izan zuten hizlariek, soldata duin eta propio baten beharra ardatz hartuta. Ipar Hegoa Fundazioak eta Manu Robles-Arangiz Fundazioak ekarpen horiek biltzen dituen txosten bat argitaratu dute, gutxieneko soldata propioak euskal langileriari ekarriko lizkiokeen eraginak eta horiei buruzko gogoetak biltzen dituena.
Gutxieneko soldata propioa ezartzea erabat egingarria da, esperientziak eta marko juridiko-politikoak aukera hori zabaltzen dutelako. Burujabetza ariketa praktiko gisa ere ulertzen du LABek. Zalantzarik gabe, LGS propioak onura ugari ekarriko lituzke: pobrezia murriztu, aberastasuna modu justuagoan banatu eta langile prekarizatuenen bizi-baldintzak nabarmen hobetzeko eta soldata arrakalari aurre egiteko tresna eraginkorra litzateke.
Hemen bertan irakurri dezakezue txostena: