Bizkaiko Aldundiko egoitzak garbitzen dituzten azpikontratatutako langileak kalera irten dira berriro, euren lan baldintzen alde, LAB, ELA, UGT, ESK eta CCOO sindikatuok deituta. Aldundiaren Foru Jauregiaren aurrean elkartu dira, Bilbon.
Bizkaiko Aldundiko zentroak garbitzen dituzten langileek ez dute amorerik emango. Iazko abenduaren 5ean mobilizazioei ekin zieten 2010. urtetik pairatzen duten soldata izozketaz nazkaturik, 20 lanpostu baino gehiagoren amortizazioaz nazkaturik. Lan-zamak eta erritmoak etengabe areagotzen dira eta nazkatuta daude. Ez dituzte bajan dauden langileak ordezkatzen eta baja horiek, gainera, gero eta luzeagoak dira egunero aurrera atera behar duten lana jasanezina delako eta horrek gaixoarazten dituelako.
Eta egunero jasaten duten errealitate honen aurrean, aurrean duten enpresak, Garbialdik, 0,14€-tako soldata igoera baino ez die eskaintzen auzi honi amaiera ipintzeko.
Pasa den maiatzean 6 egunetako greba egin zuten. Arrakastatsua izan zen, oso, langile gehienek hartu zuten parte greba horretan.
Bizkaiko Foru Aldundiak Greba-Komiteari lan-zentroetan sartzea eragotzi zion. Foru Jauregiaren aretoan ekitaldi bat ospatzen ari zen, eta ez zuten nahi gonbidatuek, eraikin hori garbitzen duten langileek baldintza prekarioetan lan egiten zutelaz ohartaraz zitezen.
Oso langile gutxik erabaki zuten greba ez egitea eta enpresak grebalariei egokitutako lanak egitera behartu zien haiei, publikora irekitako zakarrontzien hustutzea, kasu.
Garbialdik, bere aldetik, hiru langile berri kontratatu zituen bi deialdien artean, errefortzu gisa zerbitzua prestatu zuten greba egin ez zuten langileak laguntzeko eta, gainera, praktikako kontratua baten bitartez.
Lan-Ikuskaritzara jo zuten hainbat alditan irregulartasun hauek guztiak salatzeko; baina Ikuskaritzak, txosten labur baten bitartez, greba-eskubidearen urraketarik existitu ez dela interpretatu du.
Ez dira ikustezinak eta ez dute amorerik emango. Joan den astean euren Gipuzkoako lankideek lortu zuten. Akordio historiko bat sinatu zuten, egun sektorean existitzen den soldata arrakalarekin amaitzen lagunduko duena. Orain Bizkaiaren txanda da eta ez dute etsiko.