Tubos Reunidos taldeko zuzendaritzak kaleratzeak eta lan-baldintzen prekarizazioa iragarri ditu Trapagarango Productos Tubularesen lantegian. Honen aurrean, langileek greba mugagabe bati ekin zioten joan den ostegunean, eta hainbat protesta egin dituzte egunotan. Gaurkoan, manifestazio bat egin dute Bilbon, eta euren lan gatazkak beste lantegi batzuetan ere eragina izan dezakeela ohartarazi dute. Hala, Amurrion egingo dute hurrengo protesta, martxoaren 21ean, bertan baitago Tubos Reunidos Industrial enpresa (TRI). Bertako langileen batzordeak babesa eman die grebalariei, eta lantegiaren sarreran izango den elkarretaratzearekin bat egin du. Hain justu, TRI enpresako langileen batzordeak lanuzte batera deitu du martxoaren 21erako, 11:30etik 12:30era, langileek protestan egon ahal izateko.