Selecta Nafarroako langileek elkarretaratze bat egin dute gaur, Noaingo Talluntxe industriagunearen biribilgunean, enpresak egiten ari den enplegua erregulatzeko espedientea salatzeko. Espediente horren bidez 14 langile kaleratu nahi dituzte, eta lanean jarraituko dutenen baldintzak kaskartu.
Kafeak, edariak eta jakiak ematen dituzten makina automatikoekin egiten dute lan Pelican Rouge eta Selecta enpresek. Iragan urtearen bukaeran bigarrenak lehenbizikoa erosi zuen, eta, fusioaren ondorioz, enplegua erregulatzeko espediente bat proposatu zuen. Espediente horren bitartez, Selectak 14 langile kaleratu nahi ditu Nafarroan, eta lanean geldituko direnen baldintza nahikotxo okerragotuko ditu.
Nahiz eta azkenaldian Selectaren Nafarroako ordezkaritzak irabaziak erregistratu dituen, LABek argi ikusten du zein den enpresaren asmoa: bere irabaziak handitu, langileen lan baldintzak prekarizatuz. Horregatik, ordezkaritza honetako langileak hainbat mobilizazio egiten ari dira egoera hau salatzeko.