2026-11-16
HomeEkintza SindikalaArabako egoitzetako hitzarmenaren inguruko negoziazioa desblokeatzeko exijitu dugu

Arabako egoitzetako hitzarmenaren inguruko negoziazioa desblokeatzeko exijitu dugu

Arabako Foru Aldundiaren aurrean mobilizazioa egin dugu goizean Gasteizen, Gorka Urtarani eta Diputazioari beren ardurei hel diezaieten eskatzeko.

LABetik, adinekoen egoitza pribatuen gaia eztabaidatzen ari diren Arabako Batzar Nagusietako kontroleko osoko bilkuraren bueltan, kontzentrazio bat egin dugu honakoak salatzeko:

Arabako Foru Aldundiak adinekoen egoitzak pribatizatzearen aldeko apustua egiten jarraitzen du. Hala erakusten du laster eraikiko diren adinekoen lau egoitza berriak modu pribatuan kudeatzeko erabakiak.

Arabako egoitza pribatuen eta etxebizitza komunitarioen hitzarmen probinzialaren negoziazioak blokeatuta jarraitzen du. Langileek hitzarmenik gabe jarraitzen dute eta beren lan-baldintzak oso azpitik daude EAEko gainerakoekin alderatuta: gainerako herrialdeetan baino 500 € gutxiagoko soldatak, 200 ordu gehiago urtean, 14 erabiltzaile langileko.

Horregatik guztiagatik, eta hainbat urtetako aldarrikapenei jarraikiz, zera exijitzen dugu:

  • Arabako Foru Aldundiak eta patronalak langileei kasurik ez egiteari uzteko. Hitzarmenaren negoziazioa desblokeatzea berehala.
  • Zerbitzua modu publiko eta unibertsalean kudeatzearen aldeko apustu garbia. Pribatizazio gehiagorik ez.
  • Arabako egoitza eta etxebizitza komunitarioetako langileen lan-baldintzak duinagoak izatea, AFAren erantzukizuna baita.
  • Zerbitzu publikoa eta kalitatezko zaintza zerbitzu horien erabiltzaileentzat.

AZKEN ALBISTEAK | ÚLTIMAS NOTICIAS

Ikuskizun eta ekitaldien sektoreak beste bi greba egun iragarri ditu Hego Euskal Herrian, azaroaren 26an eta 27an

LABek, ikuskizun eta ekitaldien sektorean Nafarroan ordezkaritzaren %100 duen sindikatuak, EAEko beste sindikatuekin batera (Teknikariok, ESK, ELA CCOO, UGT eta CNT) bi greba egun berri deitu ditu negoziazioak desblokeatzea eta sektoreko lehen hitzarmen kolektiboa sinatzea eskatzeko. Deialdi bateratuak bi lurraldeetan partekatzen den aldarrikapen bati erantzuten dio: prekarizatutako sektore baten erregulaziorantz aurrera egitea.

Mobilizaziorako deia egin dugu, Bizkaiko Esku-hartze Sozialeko hitzarmenaren negoziazioa blokeatuta dagoelako

Hamar hilabete baino gehiagoko negoziazioaren ostean, LAB, ELA eta ESK sindikatuok aurrerapausorik ez dagoela salatu dugu, eta abenduan bi elkarretaratze eta 2027an balizko grebak iragarri ditugu, Gizardatz patronalak aldarrikapenak aintzat hartzen ez baditu.

Arabako metala borrokan: negoziazioa orain!

LAB, ELA, CCOO, eta UGT sindikatuok, Arabako metalgintzako hitzarmenaren negoziazio batzordeko kideok, plataforma bateratu bat aurkeztu dugu SEAren aitzakia guztiak saihesteko eta, behingoz, sektoreko pertsonek behar duten eta merezi duten hitzarmena negoziatzera esertzeko. SEAk, ordea, entzungor egin die langileei eta ez du hartu nahi izan sindikatuek egindako plataforma bateratua