Patronalak egindako azken proposamena ez dute begi onez ikusten beharginen ordezkariek. Besteak beste, indarraldi luzeegia hartuko luke bere baitan (2026ra artekoa), eta jasotzen dituen ordainsarien igoerak urriegiak izateaz gain, beste hainbat alorretan ere ez dira behar besteko hobekuntzak jasotzen.
Urte eta erdi darama sektoreak hitzarmena berritu gabe, eta, blokeo horren aurrean, esku-hartze sozialeko langileek premiazkotzat dute Bizkaiko Foru Aldundiaren inplikazioa, eta halaxe exijitzen ari dira azken asteotako grebetan, guztira bost egunez egin baitituzte lanuzteak. Gaur bertan, Foru Jauregia inguratu dute, mezu hori bertatik bertara helarazteko asmoz.
Izan ere, gogorarazi behar da zaintzaren sektoreko langileak direla esku-hartze sozialekoak, bereziki pandemian zehar funtsezkotzat jo zirenak, badirudien arren orain erakundeek ez dituztela aintzat hartzen.
