Atzo iritsi zitzaigun informazioaren arabera, herenegun arte martxak inolako arazorik gabe egiten ari zuen bere ibilbidea, baino herenegun gauean militante internazionalistek gaua pasa behar zuten tokira turkiar talde faxista bat azaldu zen eta internazionalistak mehatxatzeari eta iraintzeari ekin zioten era oso oldarkorrean. Atzo martxa ordu batzuetan zehar geldiaraztea lortu zuten eta martxako 2 kide atxilo eraman ditu frantses poliziak. Martxak aurrera jarraitu zuen eta atxilotuak ere askatu zituzten baina esan beharra dago, iritsi zaigun informazioaren arabera giroa urduria dela, izan ere, beste eraso bat jasateko kezka eta ezinegona nabaria da.
Bertan daudenek erran digutenaren arabera, ibilaldiaren hasieratik, Estatu frantseseko hainbat herritatik igaro da martxa eta toki ezberdinetan turkiar talde faxisten presentzia gero eta nabariagoa izan da, une oro internazionalistak zirikatzen eta probokatzen aritu direlarik. Horregatik, inoiz baino adiago egon behar dugula uste dugu Martxaren eta honen parte hartzaileen aurkako balizko eraso baten aurrean erne egon gaitezen.
LAB sindikatutik gertakari hauek gaitzetsi nahi ditugu eta martxaren parte diren talde internazionalistei gure elkartasun osoa adierazi nahi diegu eta baita martxan parte hartzen ari diren norbanako internazionalista guztiei ere.
Onartezina da modu baketsuan aldarrikapen politiko batek horrelako jazarpen faxista pairatzea. Egoera honek herri Kurduak pairatzen duen zapalkuntza agerian uzten du, baita Turkiako talde ultra-eskuindarren inpunitatea ere.
Bukatzeko LAB sindikatutik Kurdistango herriaren askatasunaren aldeko bere konpromisoa berretsi nahi dugu. Herri libre batean bizi nahi dugun pertsona libreak izan nahi dugun neurrian, Kurdoak Kurdistan libre batean bizi daitezen opa dugu.
Biji Kurdistan!