![[url=www.uriola.eus]@uriolaeus[/url]](https://www.lab.eus/wp-content/uploads/2016/05/materiala_argazkiak_zerbitzuPribatuak_museoak_16_05_11bellasArtesBilbo_bellasArtes.jpg "[url=www.uriola.eus]@uriolaeus[/url]")
Azpikontratatutako langileek kontzentrazioa egin dute gaur Museo atarian. Bertan, langile bezala bizi duten lan-egoera tamalgarria salatu dute. 34 dira kolektibo hau osatzen dutenak, denak Manpower Global Solutions enpresako langileak. Mobilizazioan bertan iragarri dute maiatzaren 16an egingo duten greba eguna.
Langileek adierazi dute zerbitzu publiko eta kultural bezala ematen dutela aupregia egunero, eta “duintasuna” eskatzen dutela bizi duten egoera latzean.
10 urte inguru daramatzate lanean, eta izoztuta dute soldata, hau da, azken urteotako berdina kobratzen dute. Euren lanpostuek ez dute inolako egonkortasunik, subrogazioa ez dagoelako bermatua.
1.200 eurotik gorako soldatak eskatu dituzte. Gaur egun, 880 eurotako soldata dute (hori lanaldi osoan ari direnek).
Museoaren jendaurreko aurpegia dira, erakusketa aretoetan balio handiko artelanak zaintzen dituzten pertsonak, bisitariei harrera egin eta sarrerak ematen dizkietenak, askotariko talde anitzei bisitaldiak eta tailer artistikoak eskaintzen dizkietenak, bisitarien zalantzak argitu eta euren iradokizunak eta kexak biltzen dituztenak, arte bilduma ezagutzera ematen dutenak…
Publikoari harrera zuzena egiten diotenak dira, eta agerikoa da museoak instituzio bezala, ezinbestekoa duela publikoa, bisitaririk gabeko museoa artelan biltegia baino ez delako. Langileak prekarietatean murgilduta dituen museo publikoa ez da inoiz izango ez kultura erreferente bat ezta jendartearentzako aberastasun iturri.
Bilboko Arte Ederren Museoak bere egitekoa betetzeko funtsezkoak dituen langileen lan baldintza duinak bermatzea eskatzen dugu. Eta Bilboko Udala, Bizkaiko Foru Aldundia eta Eusko Jaurlaritzak osatutako Patronatoari beharrezkoak diren neurriak hartzea eskatzen diegu areto zaintzaile, txarteldegiko langile, hezitzaile eta denda zein harrerako langileek laneko duintasuna berreskura dezaten, eta kalitatearen aldeko apustua eta lanaren defentsa egitea.