Etxeko Langileen Nazioarteko Egunean, pasa den martxoaren 30ean aurkeztu genuen etxeko langileen lehen atal sindikala, eta uztailaren 9an, sindikatuan antolatutako etxeko langileek performancea egin genuen Bilbon, Aldundiaren egoitza den Foru Jauregiaren aurrean. Ekimen honekin, bizi duten lan egoera eta jasan behar dituzten eskubideen urraketak ikustarazi genituen. Era berean, EAE mailako hitzarmena eskatu genuen kolektibo hau osatzen duten 28.000 emakumeentzat.
“Etxeko langileen eskubideekin jolasten ari dira” lemarekin, etxeko langileen egoera latza irudikatu genuen, jasan behar dituzte egoera zehatzetan arreta jarriz. Esaterako, asteko lanaldiak 40 ordutik gorakoak dira. Gainera, langileek arrazakeria, klasismoa eta matxismoa jasan behar dituzte, guztiz feminizatua eta nagusiki emakume migrante eta arrazializatuz osatutako sektore honetan. Lan osasuna ez dago bermatua, eta langile askok barruko lana egiten da. Ez dago langileen lan eskubideen inolako jarraipenik ez kontrolik instituzioen partetik.
Egoera larri honen aurrean, beharrezkoa eta premiazkoa da sektorea arautzea. LABek horren aldeko apustua egin du, EAE mailako etxeko langileentzako hitzarmena lortzeko bideari ekinez. Horrela, ekainaren 9an eta LABek bultzatuta, patronalarekin etxeko langileentzako lehen lan hitzarmena negoziatzeko mahaia eratzeko bilera egin zen Lan Harremanen Kontseiluan. Confebaskek mahaia blokeatu zuen eta horren aurrean, LABek epaitegietara eraman zuen patronala, etxeko langileen negoziazio kolektiborako eskubidea urratzeagatik.
Bide judizialaz gain, mobilizazioak eta aliantzak ezinbestekoak dira etxeko langileen lan baldintzak arautuko dituen hitzarmenerako bidean. Hori dela eta, uztailaren 8an mobilizazioaz gain, Confebasken egoitzaren aurrean mobilizatuko gara datorren uztailaren 13an.