Langile bat hil da Olarizun, Gasteizen, aldamio batetik behera erorita. Hildako langile honekin, gutxienez 2 langile hil dira aurten Euskal Herrian, urte hasieratik 10 egun baino igaro ez direnean. LAB sindikatutik, gure elkartasuna adierazi nahi diegu langilearen familiari eta gertukoei eta gogoratu nahi dugu, 2021ean, gutxienez 62 langile hil zirela.
Ikerketaren eta ondorioen zain, beharrezkoa da eraikuntza bezalako sektore baten laneko heriotzen oinarrizko arrazoiei aurre egitea, urtero egoten baitira horrelako lan istripuak, altueratik erortzeagatik. Izan ere, 2021ean laneko zazpi heriotza izan ziren Euskal Herrian altueratik erortzearen ondorioz, eta 2020an, modu berean hil zen langile bat Olarizu auzoan bertan.
EAEko administrazioak gaizki deitutako elkarrizketa sozialean egin zituen publizitate-kanpainetan hasi eta amaitzen diren neurriez gain, beste behin ere ikusten da horien eraginkortasunik eza eta emaitzen falta eraikuntzako istripuen aurrean. Badakigu zein den arazoaren erroa, prekarizazioa, azpikontratazioa eta sektore honetako lan-baldintzak.
Beharrezkoa da erakundeen inplikazioa eta sektore honetarako plan espezifiko bat, neurri egokiekin benetako prebentzio-politikekin. Datuek erakusten digute gaur egun arte hartutakoak ez direla eraginkorrak izan, hainbat aldiz salatu dugun bezala. Gure aldetik, borrokan jarraituko dugu langileek osasuna eta bizitza gal ez ditzaten lan egite hutsagatik.
Laneko heriotza honen aurrean, LABek mobilizazioa egingo du euskal gehiengo sindikalarekin batera datorren ostegunean, urtarrilaren 13an, 11:30ean, Gasteizko Olarizu Hiribidean. Beharrezkoa da aldaketa, langileen segurtasun eta osasuna defendatzea lehentasun izango dituen eredu ekonomiko sozial eta poliko baterantz.