Elecnor multinazionala, Telefonica-ko eta orain ere Euskaltel-eko azpi-kontratak, 4 langile kaleratu ditu Gabonen bezperan
Langileen ordezkaritzak, LAB eta ELA sindikatuek osatuta, ELECNOR enpresak burututako kaleratzeak salatzen ditugu, bat-batekotasunean, kaleratze gutun motzekin eta inongo zehaztapen edota oinarririk gabekoak. Modu honetan bertan lan egiten duten langileen baldintzen prekarizazioan beste pausu bat eman da.
Gogoratu behar dugu enpresa honen web orrialdean jasota dagoela “2021eko lehen 9 hilabeteetan irabazi netoak 60.9 milioi izatera iritsi direla”. Hau dena miseriazko lan baldintzak aplikatuz, eta instituzio zein gobernu ezberdinen oniritziarekin, enpresa hau kontratatzen baitute aplikatzen dituen lan balditzetan erreparatu gabe. Horrela, enpresak nahiago izan du kontratu mugagabea zuten 4 langile kaleratu eta aldi baterako kontratuak burutzen jarraitu. Erabili eta botatzeko langileak
Gogorarazi behar dira ELECNOR-ek pilatzen dituen ez betetzeak. Besteak beste: lan osasunean (Gasteizko lantegiko komunek ez dute pisontzirik), gehiegizkoa izateagatik bertan bera utzi zioten ERTE-a Alarma Egoeran, batzuek burutzen dituzten gehiegizko ordu extrak direla eta jasotzen dituen etengabeko isunak (300 ordu baino gehiago), edota erregistro sistema guztiz irregularra dela. Hori bai, enpresak milioiak erabiltzen ditu bere aurpegia zuritzeko.
Horregatik, Gasteizko langileek gaur, abenduaren 28a, asanblada burutu dute eta urtarrilaren 13rako 2 orduko mobilizazioa adostu dute, 10:30etik 12:30era, Lakuako Telefonikaren aurrean, kaleratze bidegabe hauek salatu eta kaleratuekin elkartasuna adierazteko.
LAB eta ELAtik guztiz arbitrarioak diren kaleratze hauek salatzen ditugu, multinazionalaren gose ase ezinari erantzuten diotenak soilik, langileon lanaren kontura bere mozkinak hobetzea bilatzen duena.
Kaleratze bidegabeak doakoak izaten jarraitzen duten heinean, eta langilea lanera itzultzeko aukerarik gabe, multinazional hauek nahi dutena egiten jarraituko dute, haien mozkinak loditzeko langileak nahieran erabiliz.