LABek urteak daramatza indarkeria matxista lantokietan salatzen eta hauek indarkeriarik gabeko gune askeak izan daitezen aktiboki borrokatzen. Aurten, beharrezkoa ikusi dugu indarkeria matxistaren ikuspegi intersekzionalari heltzea, eta berau lan munduan nola gauzatzen den ikusaraztea, hau da, honek sortzen dituen zapalkuntza anitzak nola elkar gurutzatzen diren. Eta, horren ondorioz, ezkutuan geratzen diren hainbat errealitate ezberdinak ikustaraztea, emakume* migratu, aniztasun funtzionala duten edo LGTBI+ kolektibokoetako kide direnei indarkeria matxistak nola eragiten dien mahaigaineratuz.
Horrekin batera, beharrezkoa iruditzen zaigu, egun, zer nolako alternatibak, tresnak eta baliabideak dauzkagun horren kontra borroka egiteko mahai gainean ipintzea ere. Guzti hau lantzeko, datorren azaroaren 24an militantziarentzako barne-jardunaldia egingo du LABek Iruñean. Bertan parte hartuko dute Ana Pinto eta Najat Bassit-ek (Jornaleras de Huelva en Lucha-ko kideak), Miren Beltran Lantegi Batuak-eko langileak, Aitzole Araneta sexologo, berdintasun- teknikari eta trans ekintzaileak eta Elixabete Etxeberria LABeko Idazkari Feministak.
Honetaz gain, azaroaren 22an, Bizkaiko kontserberetan indarkeria matxistarik gabeko lantokiak aldarrikatzeko mobilizazioa egingo du LABek Bermeon, 11:00etan Salica enpresaren aurrean. Izan ere, indarkeria matxistak milaka aurpegi ditu eta horietako bat lan munduak emakumeok* jasan behar dugun prekaritatea da. Sektore honetako langileek greba egingo dute azaroaren 30ean hitzarmen duin baten alde.
Ekimen propio hauez gain, Euskal Herriko Mugimendu Feministak “Indarkeria matxistarik gabeko bizitzak orain. Autodefentsa feminista antolatu dezagun” lemapean azaroaren 25ean antolatutako mobilizazioekin bat egiten du LABek. Zehazki, Baionan 18:00etan izango da manifestazioa Moracin plazatik hasita; Bilbon 19:30ean Jesusen Bihotzetik; Donostian, arratsaldeko 19:30ean Bulebarretik hasiko da manifestazioa; Gasteizen, 19:00etan Iparralde Gizarte Etxetik, eta Iruñean 20:00etan Baluartetik. Hiriburuetakoez gain, herri eta eskualdeetan ere hainbat mobilizazio egingo da egun horretan.