Zaldibarko kasuan fiskala eta akusazioak adostasunera iritsi direla jakin berri dugu eta horren aurrean, Zaldibar Argitu plataformak eta Euskal Herriko Eskubide Sozialen Kartak, lehenik eta behin familiari adierazi nahi diogu adostasun batera iristeko familiaren erabakia guztiz errespetatzen eta ulertzen dugula. Urte eta erdi oso gogorrak izan dira beraientzat eta oraindik ere sufritzen jarraitzen dute. Berriro ere elkartasuna adierazi nahi diegu eta argi utzi Zaldibarren gertatutakoa ez ahazteko eta erantzukizunak argitzeko hartutako konpromisoarekin jarraituko dugula.
Baina kasu hau aurrera eraman den modua salatu nahi dugu berriro ere. Uztailean Zaldibar Argitu eta Euskal Herriko Eskubide Sozialen Karta langileen eskubideen aurkako auzipide honetatik kanpo utzi gintuzten. Orduan salatu genuen inolako arrazoi juridikorik ez zegoela horretarako. Gainera, susmagarria da guztiz herri akusazio gisa kasutik kanpo utzi eta fiskaltzarekin adostasun batera iristea batera gertatu izana. Herri akusazio gisa onartu bagintuzten, ez dakigu zer gertatuko litzateken, baina adostasun batera iristeko akusazio guztiekin hitz egin behar da eta gu herri akusazio izanik gurekin ere adostu beharko lukete. Eta hasieratik hori saihestu nahi izan dutela dirudi.
Gainera, hilabete eskasean epaitegietako kasu bat itxi eta zabortegia bera ere itxi dute. Badirudi denboran ongi antolatuta zegoela dena azkar egitea eta gainera oporraldian. Hau ere zarata gutxi atera nahi denean Eusko Jaurlaritzak erabiltzen duen trikimailua izan ohi da.
Gertatutako ikusirik, salaketa irmoa egin nahi dugu. Herritarron parte hartzea eta egia ezagutzea oztopatzen aritu dira. Baina langilen eskubideen aurkako delituaren auzia laister itxiko den arren, oraindik ere ingurumen delitua egon den epaitzea falta da eta kasu horretan herri akusazio gara. Hasieratik hartu genuen Zaldibarren gertatutakoa argitu eta erantzukizun guztiak, baita politikoak ere, argitzeko konpromisoa. Eta horretan jarraituko dugu, egia jakin eta benetan justizia egin dadin.
Langileak, osasuna eta erantzukizunak ORAIN!