LAB sindikatuak pikete feminista aktibatu du gaur, Gasteizen, Fremap aurrean, Cocina Central Magui enpresako eskola jangeletako emakume langile bati haurdunaldiko arriskuagatik baja ukatu izana salatzeko. Baja ukatu egin da Quiron Prevencion zerbitzuak egindako txostenean oinarrituta, non ez da jasotzen ezta zehazten enpresak adierazitako arriskuen eraginpean dagoenik. Zerbitzua Cocina Central Magui enpresak kontratatu du, eta txostena orain dela 3 urteko ebaluazio batean oinarritzen da. Ez dira eguneratu urte hauetan lanpostuan emandako aldaketa guztiak.
Beharrezkotzat eta ezinbestekotzat jotzen dugu haurdunaldian lan-ingurune osasungarria babestea eta bermatzea, alde fisiko, psikologiko eta emozionalei dagokienez. Bada, mutualitateen diru-inposaketak talka egiten dute, bete-betean, gure bizitzako ziklo guztietako lan-esparruan osasunerako dugun eskubidearekin.
Kaltetutako langileak arrisku faktore hauek ditu, prebentzio zerbitzuak eta mutuak kontuan hartu ez dituztenak: agente biologikoekiko esposizioa, goi-tentsioko edo estreseko lanen eraginpean egotea, faktore ergonomikoak (hala nola, haurdun daudenentzako jarrera behartuak, kargak, gehiegizko joan-etorriak…) eta abar. Horregatik, erreklamazioa aurkeztu diogu Fremap mutuak egindako prestazio ukapenari.
Sexuaren araberako lanaren banaketak balio txikiagoa ematen die emakumeek* etxeetan edo lan-merkatuan egindako lanei, eta gure balio-galeran ere badu eragina, osasuna eta haren zaintza enpleguaren esparruan. Horrek neutraltasun faltsua dakar laneko arriskuen ebaluazioetan eta laneko osasunaren prebentzioan, gure gorputzen aniztasuna kontuan hartu gabe, gizona guztiaren erdigunean jarriz. Horrek erabat baldintzatzen du emakumeen* bizitza lan-munduan, eta ondorio kaltegarriak ditu emakumeen osasunean; askotan arriskuak ez dira aitortzen, Gasteizen salatu dugun bezala.
Emakumeei* lan prekarioak, partzialak, iraupen laburrekoak, soldata txikiagokoak eta lan-baldintza okerragoak inposatzen dizkigute. Horri guztiari lan-osasuneko baremoen gogortzea gehitzen badiogu, esan dezakegu gure osasuna, gure gorputzak eta gure bizitzak ez diola sistemari axola, ustiatzeko soilik. Sistema kapitalista heteropatriarkalak laneko segurtasun eta osasunaren arloan ezartzen dizkigun eskubide urraketak, aurrean dugun diskriminazioa eta gure osasunarekiko arreta falta onartezinak dira. Gure eskubideen eta osasunaren alde borrokatzen jarraituko dugu.