Joan den astean egindako protesten ondoren, helduen egoitzetako langileak Donostian egoitza duen Lan Harremanen Kontseiluaren aurrean mobilizatu dira, LAB eta ELA sindikatuok adostu dugun edukien dokumentua bertan aurkeztu eta gero. Hilabeteak dira helduen egoitzetako hitzarmenaren mahai negoziatzailea ez dela elkartu, eta, ekintza honen bidez, hitzarmenaren negoziazio baterako apustu garbia egiten dugula adierazi nahi dugu berriro ere.
Gipuzkoako hitzarmen duin bat edukitzeko garaia da. Sektoreko langileak, nahiz eta egoera oso gogorrak bizi behar izan, onena ematen ari dira eta ez dute onartuko herrialdeko hitzarmen duinik gabe jarraitzea. LAB sindikatutik ADEGI, MATIA 2020, LARES eta ACGG patronalei beraien ardurak asumitu eta mahaian hitzarmena negoziatzera eseri daitezen exijitzen diegu. Sektoreko arduradun nagusia den Gipuzkoako Foru Aldundiari berriz, herrialdeko hitzarmen duin bat lortzeko bidean, beharrezkoak diren erabakiak hartu ditzala exijitzen diogu, hitzetatik ekintzetara pasatuz.