Krisi hau hasi zenetik helduen egoitzetako sektorea izan da ondorio gehien eduki dituenetarikoa. Egoiliarren artean heriotz tasa oso handiak izan dira, egoiliarrak hilabete asko egon dira egoitzatik atera ezinik, beraien senideekin egon ezinik… langileen lan-karga eta erritmoak egunetik egunera handiagoak dira, bete beharreko protokoloak egun batetik bestera aldatzen dira eta hauek ez dira inoiz langileekin adosten.
Guzti honen ondorioak dramatikoak dira. Langileak euren osasuna arriskuan jartzen ari dira eta egoiliarrek ezin dute merezi duten zerbitzua jaso, beraien osasuna ere arriskuan jartzen delarik.
Egoera honetan, Gipuzkoako Foru Aldundiak ez du dagoen lan gatazkari irtenbidea emateko inongo neurririk hartu, eta indarrean dagoen ratioen inguruko katalogoa ez du aldatu. Honek esan nahi du langileek herrialdeko hitzarmenik gabe jarraitzen dutela, eta krisi honek eragindako lan karga eta erritmoei aurre egiteko, Aldundiak ez duela langileen ratiorik aldatu.
Gipuzkoako Foru Aldundia helduen egoitzetako langileekin agiten ari denak ez du izenik. Ezin dugu onartu langileek dena ematen duten bitartean, eta egoera hobetzea suposatuko duen neurriak hartu beharrean (herrialdeko hitzarmena egotea eta ratioak hobetzea) Gipuzkoako Foru Aldundiak zentzu honetan ezer ere ez egitea.
Langileak, duela urteak hasi ziren beraien lan baldintzen alde borrokan. Mobilizazio eta greba egun asko egin behar izan dituzte eta oraingoan ere langileen tresna den greba eskubidea ukatu diete, urriaren 6ko azkeneko greba egunean Eusko Jaurlaritzak onartu dituen gutxieneko zerbitzuetan, ia kategoria guztietan %100eko zerbitzu minimoak zehazten dira. Eskubide Urraketa bortitz honen aurrean eta langileen aldeko defentsan, LAB sindikatuak eskubide urraketa honekin epaitegian salaketa sartzea erabaki du.
Instituzio publikoak errealitatea hobetuko dituzten neurriak ez dituzte hartzen, baina langileek beraien aldarrikapenak egiteko oinarrizkoa den greba eskubidea kentzeko gai dira.
Irmoki salatu nahi dugu Gipuzkoako Foru Aldundiak eta Eusko Jaurlaritzak hartu duten jarrera. Beraien egitekoa, besteak beste, langileak eta egoiliarrak defendatzea da eta oso urrun geratzen ari dira horretatik.
LAB sindikatuak ez ditu langileen kontrako erasoak onartuko, tinko egongo gara gure eskubideak defendatzeko garaian.