“Langileen botoarekin, altzairuzko EAJ!”. Andoni Ortuzarren hitzak entzuten ziren oraindik EAJren mitinean, Barakaldon, ertzainek, beren agindu zuzenei erantzunez, Usoako Enplegu Zentro Bereziko langileak bultzatzen eta identifikatzen zituzten bitartean. Atzo gertatu zen hori. Gaur, langileak berriro mobilizatu dira euren eskubideen defentsan, Barakaldoko udaletxe aurrean oraingoan. Hain zuzen ere, udal honen menpeko enplegu zentro berezia da USOA, 350 langile dituena.
Hau da Usoako enpresa batzordearen gaurko oharra:
USOAko langileak, beren lan baldintzen eta USOAren etorkizunaren eske, Barakaldoko Boulevardean kontzentratu ziren atzo. Turutak eta txistuak erabilita, EAJ eta PSOEri, gobernu talde gisa, langileen bizi-baldintzak bermatuko zituen hitzarmen duin bat negoziatzeko eskatu zieten.
Erantzun sendo eta errepresiboak argi uzten du EAJren jarrera USOA langileen eskubideen inguruan eta, oro har, euskal langileen eskarien inguruan. Ez gaituzte entzun nahi.
EAJk ez du langileok esan behar duguna entzun nahi, eta gainera, lan baldintza eta bizi baldintza duinen aldeko oihuak isilarazi nahi ditu.
USOAko enpresa batzordeak erabateko gaitzespena adierazi nahi dio atzoko elkarretaratzean gertatutakoari. Bestalde, azalpenak eskatzen dizkiegu gobernu taldeari, EAJren taldeari eta Amaia del Campo Barakaldoko alkateari. Atzo elkarretaratze horretan gertatutakoak, tailerrerako baldintza duinak eta etorkizuna eskatzeko, EAJk datozen hilabeteetan gizarteari eskainiko dionaren erakusgarri txiki bat dela dirudi.
Enpresa-batzordetik argi daukagu, ez gaituzte isilduko.
Usoa etorkizun eta hitzarmen duin baten aldeko borrokan!
Hurrengo ostegunean, uztailaren 9an, goizeko 11:30ean Barakaldoko Udalaren aurrean mobilizatuko gara.