Gaur, uztailak 7, metalgintzako negoziazio mahaiaren lehen bilera egin da, covid19aren ondorioz 4 hilabetez bildu ezin izan ondoren. Bilera honetan sindikatuok gure proposamenak aurkeztu ditugu. LAB sindikatuak gaur egungo plataforma oso soziala aurkeztu du.
LABen proposamenaren ardatz nagusiak hitzarmen kolektiboari egonkortasuna eta segurtasun juridikoa ematea dira. Izan ere, gaur egun indarrean dagoen hitzarmena 2011koa da, eta lan-erreforma baino lehenagokoa. Horretarako, ezinbestekoa da hitzarmenari ultraaktibitate mugagabea eta haren aplikazioa bermatuko duen klausula ematea. Era berean, gure lan-baldintzak okertzen dituzten estatuko hitzarmenen gainetik aplikatzeko lehentasuna eman behar diogu hitzarmenari. Gipuzkoako hitzarmenak lurraldeko metalgintzako enpresen lan-harremanak arautuko dituen esparrua izan behar du, kanpoko esku-hartzerik gabe. Hitzarmenak soldata-igoerak izan behar ditu, galdutako erosteko ahalmena bermatzeko eta datozen urteetarako KPIa baino igoera handiagoekin. 16 orduko lanaldi-murrizketa, 35 ordura iristeko helburua betetzen joateko, enpleguari eusteko eta enplegua sortzeko eta benetako kontziliazioa gauzatzeko.
Enplegua hobetzen duten neurriak, hala nola behin-behinekotasuna eta ABLEak mugatzea, gazteen kontratua hobetzea, lana eta familia bateragarri egitea (lizentzien hobekuntza gisa), deskonexio digitalerako eskubidea hitzarmenean arautzea eta lanaldia egokitzeko eskubideari edukia ematea. Era berean, hitzarmen honek benetako berdintasuna bermatu behar du, emakumeak sektore horretan sartzen joateko neurriekin.
Honetaz gain, amiantorik gabeko industria baterantz joateko plan bat, bajak osatzea, garraio publikoa eta enpresako autobusa sustatzea, mugikortasun funtzionala duten langileak integratzeko neurriak dira, besteak beste, eskatzen ditugun beste neurri batzuk.
Bileraren alde positiboa izan da guztiok, patronala barne, hitzarmena negoziatzen jarraitzeko prest gaudela. Hortik aurrera, desadostasun eta ikuspuntu ezberdinak azaleratu dira. Hurrengo bilera uztailaren 16an izango da.