PPren Gobernua marra gorri guztiak gainditzen ari da eskubide sozialak eta pertsonen duintasuna zanpatzeko orduan. Azken froga dugu iragarri berri den neurria: egoitza baimena lortzeko aukera ematea etxebizitza bat erosiz gero.
Begibistan da PPren politikaren muina: erabilkeria, alegia erabili eta bota. Bai Estatuan bai Euskal Herrian, langileok, langabeak, pentsiodunak, gazteak,… haien politikaren jomuga bilakatu gara, eta besteak beste, langileon jatorria erabili egiten dute hainbat sektore migranteen kontra: kanporatzeak bultzatzeko, osasun, etxebizitza eta prestazio sozialetarako eskubideak ukatzeko,… Hain zuzen ere, milaka gazte, lan eskubidea ukatuta, gure herritik alde egiteko bilatzen duen politika berbera.
Beraz, haien etxebizitza merkatua salbatzeko neurri hau, aurreko egunotako gertaeren azken katebegia da. Etxebizitza eskubidearen ukapenak eta etxe-husteen aldeko erabakiek milaka laguni eragiten diote Euskal Herrian, haien artean makina bat pertsona migranteri. Espainar Estatuaren botere finatzieroa eta politikoaren borondatea ezin argiago ikusten da eskubide sozialak erauzteko orduan. Etxebizitza galtzen duen edo galtzeko mehatxupean bizi direnen aurrean, Gobernua eta Banketxeak elkarren eskutik daude. Hor ditugu Gobernuaren azken neurriak etxe-husteen inguruan, arazoari muinetik heltzeko intentzio falta ezkutatu nahian. Eta hor ditugu banketxeak mehatxatuak, Hipoteka Legea aldatuz gero, maileguak gogortuko dituztela etab. Egiten ari direna estortsio hutsa.
LAB sindikatuak dei egiten langileoi etxebizitza sistema ustel hau errotik aldatzeko. Ezin dugu onartu Euskal Herrian, edozein izanda gure jatorria, kaleratuen etxebizitzak espekulatzaileen eta banketxeen objektu bihurtzea, hauen jatorria edozein izanda ere. Bat egin dezagun Euskal Herrian bizi garenok euskal instituzioek etxebizitza eskubide errealearen alde egin dezaten, etxebizitza eskubidearen kontura negozioa egiten ari direnen interesak babesteari utzita.
Euskal Herrian, 2012ko azaroaren 20an