Arabako Gazteriaren Foru Erakundeko (GFE) 65 langileek pasa den astean ekin zieten euren egoera salatzeko lanuzte eta mobilizazioei. Gaur ere mobilizatu dira foru erakundearen Gasteizko egoitzaren aurrean, eta ekainaren 21ean berriro mobilizatuko dira.
2017an azken hitzarmen kolektiboa sinatu zenetik izan den luzapenari, plantilla-eskasia eta enplegu suntsipena gehitu behar zaizkie, baita hainbat programatako inbertsioaren murrizketa ere. Horrek gazteenei zuzendutako programetarako eskainitako plazak gutxiago izatea dakar, hala nola Udaraban (Udalekuak), Ikasgeletan (Barria, Espejo eta Zuhatzako aterpetxeetan egindako egonaldiak, Arabako ikastetxeetako ikasleei zuzenduak), edo Lurrikara programarako zuzkidura eskasa (gazteek landa-ingurunean parte hartzera eta emantzipatzera bideratutako programa).
Oraingoz ez dituzte deitu egoera desblokeatzera, eta horrek erakusten du Gerentzia-Zuzendaritzak eta Kultura eta Kirol diputatuak afera konpontzeko duten interes txikia.
Langileek badakite beren mobilizazioek eragina izan dezaketela gazteengan eta GFEko aterpetxeetako gainerako erabiltzaileengan. Baina kontuan hartuak izateko egin ahal duten gauza bakarra da.
Langileek zain jarraitzen dute, Zuzendaritza Nagusiak (GFE) eta Arabako Foru Aldundiko Kultura eta Kirol Diputatuak (haren esku dago GFE) gatazka hau konpontzeko premia ulertu eta gazteei zuzendutako programetan eta plantilla honetan inbertitzeko erabakia har dezaten. Izan ere, langileek beren onena ematen jarraitzen du gazteekiko konpromisoa aurrera eramateko.