LAB SINDIKATUA

2017/10/20 :: 10:31

Azken Eguneraketa:2017/10/20 :: 5:50

HIZKUNTZA
Hemen zaude: FEDERAZIOAK ZERBITZU PUBLIKOAK Zerbitzu Soziokomunitarioa Indarrak metatzeko deia egin dute etxez etxeko laguntza eskaintzen duten langileek

Indarrak metatzeko deia egin dute etxez etxeko laguntza eskaintzen duten langileek

E-posta Inprimatu PDF fitxategia
Partekatu albistea



LAB, ELA, UGT eta USO sindikatuok mobilizazioak egingo ditugu datozen asteetan, udalen arduragabekeriei aurre egiteko eta gizarte-zerbitzu hau kudeatzen dutenek agertzen duten enpresa-grinari aurre egiteko. Agerraldi bat egin dugu gaur aurreikusitako protestak iragartzeko.

Etxez etxeko Laguntza Zerbitzua, izatez, gizarte zerbitzu publikoa dugu, Menpekotasun legeak nahiz Euskadiko Gizarte Zerbitzuen Legeak lehentasun zerbitzutzat jotzen dutena. Hala ere, erakundeek egiten duten garapenak eta erabilpenak zerbitzu hau hondar-egoera batera, kanpoko eragileek eta enpresa pribatuek kudeatutako zerbitzua izatera baztertu dute, non zerbitzuaren kalitatea eta helburua eta lan eskubideen bermea baino, enpresen irabaziak lehenesten diren.

Horrek hainbat ondorio kaltegarriak ekarri ditu berekin:

-Sorospenari dagokionez: ez da zerbitzua bermatzen, ez eta haren beharra duten pertsonek behar duten estaldura ere; zerbitzuaren intentsitatea eznahikoa da erabiltzaileen premiei dagokienez. Ordu kopurua %30ean murriztu da, gutxi gorabehera, Bizkaia osoan; eguneko zerbitzua 30 minututakoa izateraino iritsi da ere. Bestalde, erakunde beraiek “aholkatzen diete” erabiltzaileei bestelako prestazio moten aldeko hautua egin dezatela, ekonomikoen alde alegia, haien erabilera kontrolatu barik ematen direlako. Horrela, ez da inondik inora bermatzen menpekotasunen bat duten pertsonen zaintza profesionalizatua, eta horrela, bide ematen zaio ekonomia ezkutuari, ez kontrolatuari.

-Lan arloari dagokionez: ez zaigu enplegua bermatzen, hamarkadetan, zerbitzu hau egin dugunoi. Lanorduak urritu izanak iraizpen askoren, lanaldien murrizpen askoren eta lanorduen malgutasun handiagoren artean kamuflatu den Enplegua Erregulatzeko Espedientea ekarri du. Azken hitzarmen kolektiboak araupetu zituen lanorduen eta tarifen murrizketak, egokitu zituen udalek eta Aldundiak egin murrizketak lan-araudiari. Horren ondorioz, eros-ahalmenak galera jasan zuen, eta laneko eskubideak ostu ziren, horrela, udalek eta zerbitzuaren enpresa kudeatzaileek, eskariaren arabera, beharginak eskuragarri izan ditzaten.

-Azpimarratu, gure sektorea, ia osotasunean, emakumez osatua dagoela; gehienak adin ertainekoak. Bakarka aritzen ohi gara lanean, bizitzari lotu oinarrizko premietan laguntzeko, etxez etxe ibili ohi gara, adibidez, garbitasuna, mobilizazioak, jatorduak, jendearen jagoletza, erosketak,... eta menpekotasun egoeran daudenei, laguntza fisikoa eta emozionala ematen diegu. Hori guztia egin ohi dugu, zereginak gure osasunari kalteak ekar ez dakizkion egokiak izan daitezkeen baliabide eta laguntza mekaniko barik. Behargin gutxik irits gaitezke erretiro arruntera; erretiro aurreratua maiztasun handiz ematen da beharginen artean: lan hau egitea ezinezkoa suertatzen delako adin jakin batetik aurrera, eta lan-zamak eta enpresek prebentzio neurririk ezartzen ez dutenez, gure narriatze fisikoa oso handia delako.

Argi eta garbi salatu gura ditugu kudeatzen duten eta gure ahaleginaren izerdiari esker eta finantziazio publikoko zerbitzua erabiliz aberasten direnak, patronalak alegia. Enplegua eta lan baldintzak kaskartu izanaren gaizkide zuzenak dira, lizitazioetan, ahalik eta merkeen egin enkanteetan parte hartzen dutelako. Horrek, lehentxeago, diagnostikoan aipatutako ondorio latzak dakartza berekin. Horiek lan baldintzak pitinka-pitinka okerrera egin izanaren eragileak dira, lanaldiak handitzearen eta lanaldiak zehaztasun barik banatzearen eragileak dira, urte osoan zehar lan egutegi gorabeheratsua edukitzeaz, eskaerak aginduta lan egiten duten langileak izatearen sortzaileak dira.
Jagoletzaren krisialdia egunez egun areagotzen ari den errealitatea da. Krisialdiak zerbitzu honen beharra duten eta hartan lan egiten duten gero eta pertsona gehiagok jasaten dute.

Horrengatik, ondorengo neurriak bidera ditzaten eskatzen diegu Erakunde titularrei, Udalei eta/edo Mankomunitateei:

-Abenduaren 5eko Zerbitzu Sozialetako 12/2008 Legearen 60.1 artikuluaren arabera, Udalek eta/edo Mankomunitateek aukera dezatela zerbitzuaren kudeaketa zuzena egitea, zerbitzu bera osoki lehengoratzeari ekinez, horrela, guztiz berma daitezen gaur egun zerbitzua betetzen ari garen langileon Eskubidea, erabiltzaileok kalitateko eta behar beste intentsitateko zerbitzua jasotzeko Eskubidea eta etxez etxeko zereginetan dihardugun langileoi gure eginkizunaren onarpena. Erakunde Publikoei zuzenki lotuak dauden pertsonei egokitzen zaizkien lan baldintzak arautzeko akordioa ezarriko da.

-Aurreko puntuan aipatutako iragatean eta haren eginkizunen jardunean, bere gain har dezala zerbitzu honen prestazioan dagokion erantzukizuna eta agindu dezala ondoren adierazten den konpromisoa:

Baldintza pleguetan jaso dadila langileen eta haren laneko baldintzen subrogazioa, kontratuaren baitan bete beharreko lanaldiak bermatuz.

Lan poltsa arautuak landu, behin-behineko langileei egonkortasunaz hornituz, Administrazio berean egiten den antzera.

Lan Eskubideak bermatuko dituzten klausula sozialak sustatu.

Behar besteko aurrekontu batez hornitu.

Gure lanak, lan egindako ordu bakoitzeko lan zama handiegiak, eta bakarka egindako lanak eta beren etxetan menpekotasun mailaren bat duten pertsonekin lan egiteak eragin arriskuei aurre egiteko neurri egokiez hornitu.

Zuzenean nahasi Sektoreko Hitzarmen Kolektiboaren negoziazioan.

Erreferentziako hitzarmena ezarri, berau Bizkaian Sektoreari dagokion Hitzarmen Kolektiboa izanik; dena den, bermatuko dira, gutxienez, hitzarmen berean ezarri lan baldintzak eta behar besteko prezioak ezarriko dira, osoki lan baldintzetara esleituko direnak.

LAB, ELA, UGT eta USO sindikatuok, Bizkaiko Etxez etxeko Laguntza Zerbitzuak bizi duen errealitate gordinari buruzko diagnostikoan, beharginokin batera egin duguna, berresten gara, baita erreibindikazio-plataforma bateratuan jasotzen diren edukietan ere.

Horrengatik, behargin oro deitzen dugu indarrak metatzera eta Udalen arduragabekeriei aurre egiteko eta gizarte-zerbitzu hau kudeatzen dutenek agertzen duten enpresa-grinari aurre egiteko mugimendu handia artikula dezaten.

Honekin batera aditzera ematen ditugu beharginen batzarrean onartu diren ekimenak:

-Urriak 10, asteartea: Bilboko udaletxe aurrean elkarretaratzea, 17:30ean.
-Urriak 17, asteartea: Santurtziko udaletxe aurrean elkarretaratzea, 17:30ean.
-Azaroak 7, asteartea: Getxoko udaletxe aurrean elkarretaratzea, 17:30ean.
-Azaroak 14, asteartea: Bilbon manifestazioa, 17:30ean.

Interpelazio politikoa
Urrian, erakundetan ordezkatuak dauden alderdi politikoei elkartzeko hitzordua eskatuko zaie, gure egoeraren eta eskarien berri izan dezaten, eta bide batez, eskatuko zaie lot ditzatela konpromisoak Udaletan.

Honez gain, adierazten dugu, mobilizazio hauek egin ostean, beste fase batera igaroko ginatekeela, abenduan, lanuzte batzuk eginez, indar handiagoa emanez aldarrikapenari.