Espainiar zein frantziar Estatuetatik eta bertoko Gobernuetatik datozen eraso eta murrizketen aurrean konfrontazioaren bidea aukeratu dugu, euskal esparru sozioekonomikoaren aldeko borrokan gabiltza eta lanaren eta aberastasunaren banaketan oinarrituko den eredu berri baten alde ari gara. Bide hau langileen indar eta mobilizazioari esker ari gara jorratzen.
Udaberriko agenda betea datorkigu. Jauzi bat ematera goaz, eta hau irudikatzeko hitzorduak ez zaizkigu falta, hor ditugu, besteak beste, Apirilaren 28a, Maiatzaren 1a eta maiatzaren 28ko mobilizazio nazionala eta ondotik etorriko den Borroka Astea.
Maiatzaren Lehena – EskuBIDEAK aktiBATUZ
Maiatzaren Lehenean “Langileok Martxan esku BIDEAK aktiBATUZ! Euskal Herria contra la precariedad” lemapean aterako gara kalera. Sindikatua, langile klasearekin batera martxan da prekarietatearen kontra. Eguneroko arazo eta gatazkei erantzuten jarraitzen dugu, eta horrez gain, ekintza sindikala eraberritu eta indartu dugu. “Langileok Martxan eskuBIDEAK aktiBATUZ” ideiarekin eskubideen inguruan lantokietan garatzen ari garen lerroari isla eman nahi izan diogu, baita bideak batzeko beharrari ere, hau da, langileon fragmentazioa, indibidualizazioa gainditzeko beharrari.
Bizi dugun larrialdi egoera atzean uzteko beharra agendaren erdigunean kokatu dugu. LABen ustez prekarietatea eta pobreziarekin amaitzeko bide bat eta bakarra dago: lan mundua aldatzea eta aldaketa soziala bultzatzea. Eta langileok badugu indar nahikorik horretarako.
Aldaketa eragin nahi badugu, langileon borrokaren bidez, prekarietatea eta pobrezia gainditzea agenda politiko instituzionaleko lehen lerroan kokatzea lortu behar dugu. Azken batean lan munduaren egoera ez da arazo laboral bat, inposatu zaigun eredu sozioekonomiko jakin baten ondorioa baizik.
Arnas luzeko bidea da hau, baina urratsak ematen ari gara jada. Ekintza sindikalean LABek prekarietatearen kontrako lerro oso bat zabaldu du eta prekarietatea gogorki pairatzen duten langileei protagonismoa eman diegu. Sindikatutik kanpo zegoen jendearengana gerturatu gara eta alternatiba erreal bat eskeini diegu.
Mobilizazio soziala ere ardatz hartu dugu. Elkarlanaren bidetik egoera sozioekonomikoa aldatzeko behar ditugun tresna, dinamika eta lerroak garatu ditugu. Zentzu honetan Euskal Herriko Eskubide Sozialen Karta aliantza marko gisa indartzen ari da eta dinamika altenatiboak sustatzeko tresna gisa gorpuzten ari da.
Aitzindariak izan gara, bestelako lan munduak bestelako eredu sindikala eskatzen duela ulertu eta esaten. Azterketa horretatik abiatuta eredu sindikala birpentsatzeko prozesuan murgildu da sindikatua.
Bide horretatik jarraituz lortuko dugu behar dugun jendartea eraikitzea, bideak batuz eta norabide berean indar eginez. Horretarako hitzorduak ez dira faltako Maiatzaren Lehenean.
APIRILAK 28. LanOsasunaren Nazioarteko Eguna
MAIATZAREN LEHENA
MAIATZAK 28
MOBILIZAZIO NAZIONALA
MAIATZAK 30 – EKAINAK 3
BORROKA ASTEA