2024-09-20
HomeEkintza SindikalaUGT, CCOO eta CENek lan-baldintzak Nafarroan negoziatzeko eskubidea langileei ukatzea erabaki dute

UGT, CCOO eta CENek lan-baldintzak Nafarroan negoziatzeko eskubidea langileei ukatzea erabaki dute

LAB eta ELA sindikatuok hainbat kontaktu izan ditugu CEN patronalarekin eta UGT eta CCOO sindikatuekin, negoziazio kolektiboan Nafarroako hitzarmenak ezartzea lehenetsiko lukeen akordio interprofesional bat lortze aldera. Hala, lanketa honek izandako bidearen beri eman dugu gaur Iruñean, komunikabideen aurrean. Hain zuzen ere, nabarmendu dugu UGT, CCOO eta Nafarroako Patronalak jakinarazi digula sindikatuoi ez dutela nahi Lanbidearteko Akordio bat, baldin eta horren helburua estatu-hitzarmenetako baldintza anitzez apalagoak Nafarroatik kanpo uztea bada.

Zapateroren Gobernuaren 2011ko lan-erreformak bide ematen die estatu-esparruko hitzarmenei negoziazio-gai jakin batzuk haientzat erreserbatzeko, eta sektoreko probintzia-hitzarmenetan ezarritakoa guztiz edo zati batez deuseztatzeko. Lan erreforma horretaz baliatzen ari dira UGT, CCOO eta Patronalak estatu-hitzarmenak Madrildik ezartzeko (eraikuntzan, ostalaritzan, metalgintzan, sukaldaritza kolektiboan…). Negoziazio kolektiboaren estatalizazioa dela eta, Nafarroako langileen lan baldintzak nabarmen okertzen ari dira.

LABek eta ELAk, 2017. urtean, proposamen bat helarazi zieten CENi eta UGT eta CCOO sindikatuei, Nafarroako sektore-hitzarmenak lehenesteko, Madrilen sinatzen direnen aitzinetik. Ez dago beste helbururik langile nafarrei lan-baldintzak erabakitzea uztea baino, Madrilgo esku-sartzerik gabe. Alde horretatik, oroitu beharrekoa da 2017ko urtarrilean LABek, ELAk, UGTk, CCOOek eta Confebaskek tankera bereko akordio bat sinatu zutela EAEn.

UGTk, CCOOk eta CENek ezetza eman diote LABek eta ELAk egindako proposamenari.

Bi sindikatuok salatu nahi dugu UGT, CCOO eta CENen jarrera hori, langile nafarrei lan-baldintzak erabakitzeko eskubidea ukatu dietelako, baita negoziazio kolektiboa estatalizatzeko bidea urratu ere.

Azkenik, ELAk eta LABek gure defentsa berretsi nahi dugu lan-baldintzak Nafarroan erabakitzeko eskubidea bermatuko duen negoziazio kolektibo ereduari.

 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.