Gaur, apirilak 23an, bi lan heriotzen berri izan dugu. 45 urteko garraiolari nafar bat zendu zen atzo N-240 errepidean, Escon (Zaragoza), kamioa irauli eta gero. Gaur arratsaldean, berriz, jakin dugu Gasteizko Caser Zahar egoitzako langile bat hil dela, koronabirusaren ondorioz. Azken heriotza hau salatzeko elkarretaratzera deitu dugu euskal gehiengo sindikaletik biharko, 12:00etan, Gasteizko helduen egoitza guztien aurrean.
Lehenik eta behin, LAB sindikatutik gure doluminak eta elkartasun eta babes osoa helarazi nahi diegu hildakoen senide, gertuko eta lankideei.
Azken bi heriotz hauekin, gutxienez 29 langile hil dira Euskal Herrian urtea hasi zenetik eta beste bi langilek, Alberto eta Joakin, desagertuak jarraitzen dute Zaldibarreko zabortegian, otsailaren 6tik.
Alarma egoera honetan, lan zentroetan, langileen segurtasuna bermatzeak lehentasuna izan behar du. Zoritxarrez, errealitateak erakusten digu langileon segurtasuna ez dagoela bermatua lan zentroetan, langileek jarraitzen dute bizitza arriskuan jartzen eta batzuetan bizia galtzen.
Jaurlaritzari exigitzen diogu arduraz jokatzea eta langile guztien segurtasuna eta babesa bermatzeko beharrezkoak diren baliabide tekniko eta giza baliabideak martxan jarri dezala. Aldi berean, plan eraginkor bat artikulatu dezala eskatzen diogu helduen egoitzetan bizi diren egoera penagarriei aurre egiteko.
Behin eta berriro salatu dugu langileek pairatzen duten babes eta segurtasunik eza.
Inoiz baino gehiago, osasuna interes ekonomikoen gainetik jartzeko momentua da. Ez dugu onartuko krisi honen kudeaketa eta ondorioak langileen bizkar gainean erortzea.
Gehiengo sindikaletik biharko deitu dugu protesta, Gasteizko helduen egoitza guztietan. Bost minutuko elkarretaratzeak egingo dira, 12:00etan.