Atzo, apirilak 20, Arcelor Mittal-eko enpresa komitea eta enpresaren artean izandako bileran, azken honek Zumarragako aktibitate industriala mantentzea posible egingo luketen neurri alternatiboen inguruan hitz egiteari uko egin dio berriro ere. Gainera azaldu dute gaur egungo produkzioaren %85 ez lukela Arcelor Mittal taldeak produzituko, eta hau harrigarria iruditu zaigu.
Enpresa komiteak, bere aldetik, enpresarekin adostutako etorkizuneko plan alternatibo bat aurkeztea proposatu du, baina proposamen honi ere enpresak ezezkoarekin erantzun dio. Argudioak jarri ditugu mahai gainean, eztabaidatu dugu enpresak azaldutako arrazoien inguruan, baina honen aurrean enpresak adierazi du ez dela arrazoien inguruan eztabaidatu behar, itxieraren inguruan hitzegin baizik.
Planta bideragarria da. Horregatik dei egiten diegu erakunde eta jendarte osoari plantaren aldeko apustua egin dezan itxiera ekidin eta enplegua mantentzeko.