Akordio berria eta III. Hitzarmen Kolektiboari aldaketa bat inposatzeak ondorio larriak izan ditzake Correoseko langileen lan-baldintzetan eta, hedaduraz, hauek ematen duten posta-zerbitzu publikoan. Correosen eta langile guztien etorkizuna defendatzeko, LAB, ESK eta ELA sindikatuok mobilizazioa egin dugu Donostian goizean. Arratsaldeko 18:00etan ere elkarretaratzeak egingo ditugu Bilbo, Donostia, Gasteiz eta Iruñean.
Correoseko langileen lan-baldintzek are gehiago okertzen jarrai dezakete. Enpresak eta CCOO, UGT, CSIF eta SL sindikatuek milaka lanpostu suntsitzea ekar dezakeen akordio bat sinatu dute. Izan ere, langileen gastuak % 85etik %70era igaro daitezke 2 urtetan, ordainsari-erregimena jardueraren neurketa indibidualekin lotu daiteke, lanaldiko orduen %10 aurreikusitako kargaren arabera aldatuko den lan-egutegia ezarri daiteke, eta sakondu langileen mugikortasun funtzionalean, geografikoan eta zentroen artekoan. Horrek guztiak eragin zuzena izango du enpleguaren kantitatean eta kalitatean, baita enpresa publikoak egin beharko lukeen komunitatearen aldeko kalitatezko zerbitzu publikoan ere.
LAB, ESK eta ELA sindikatuok etorkizuneko IV. Hitzarmen Kolektiboa eta Akordioa langileen eskubideak kontuan hartuz arautzea eskatzen dugu, soldata, lanaldia, kontziliazioa eta lan-osasuna bezalako gaiak hobetzeko. Correosen kalitatezko zerbitzu publikoaren aldeko apustua eginez, besteak beste, soldatak KPIrekin lotzeko klausula, asteko 35 orduak ezartzea, egiturazko lanpostu guztiak benetan betetzea eta galdutako milaka lanpostu berreskuratzea nahi dugu, Madrildik inposatu nahi digutenaren guztiz kontrakoa.