Tubos Reunidoseko Akziodunen batzarra egin dute gaur, Bilbon, Guggenheimen. Talde honen barruan daude Productos Tubulares eta Tubos Reunidos enpresak, eta bertako langileek elkarretaratze bat egin dute batzarraren atarian. Hain zuzen ere, gutun bat helarazi diete akziodunei, langileak pairatzen ari diren errealitatearen berri emateko.

Hauxe da Tubos Reunidoseko akziodunei helarazitako gutuna:

TUBOS REUNIDOS SA taldearen akziodunen batzarrari,

Honen bidez, TUBOS REUNIDOS SAko LABen eta PRODUCTOS TUBULARES S.A.U.ko LAB eta ESKren sail sindikalek adierazten dute:

Lehenengo eta behin, gogorarazi nahi dizuegu gaurko egunez erabakiko duzuenak berehalako ondorioak ekarriko dizkiela gure lantokiei, eta hortaz, ia 1.500 familiari zuzenki eragingo diela.

Denok dakigu taldea zailtasun ekonomikoetan murgildua dagoela, eta egoera, zuok izendatu zenuten zuzendaritzak sortu zuela; goi zuzendaritzakoek sustatu dituzten akatsetan, langileok ez dugu inoiz izan inolako ardurarik.

Nahi genuke ere, gogora dezazuela, eta gogoan izan dezazuela, PRODUCTOS TUBULARES S.A.U.ko langileok egungo zuzendaritzak, zeuok berriro izendatu duzuena, agertu duen neurri zuzengabearen aurka, duela lau hilabete eskas, egitear egon ziren greba mugagabea.

Adierazi dugunean oinarrituz, eskatzen dizuegu:

-Taldeari bideragarritasuna ematen lagunduko dioten neurri errealei eta eraginkorrei ekin behar zaiela; argi eta garbi dakigula irteera horretan ez direla langileen eskubideak murriztuko, soldatari ez zaiola kalte egingo, lanaldia ez dela handituko, prekarizazioa, altzairutegiaren itxiera, edota gizartearen aurka egin daitekeen edozein neurri.

Irtenbidea izan dadin, kapitala handitu behar da, edo bestela, likidezia injektatu behar da, eta egiazko industria plana aurkeztu behar da; honez gain, gogorarazi nahi dizuegu zuok guztiok azken hamarkadetan, gure industria-jardueratik mozkin mamitsu eta itzelak lortu dituzuela.
Horrengatik, eskatzen dizuegu arduraz eta justiziaz erabaki dezazuela.

-Benetako hitzarmenaren negoziazioari ekin behar zaio, Tubos Reunidos Industrialen, nahiz Productos Tubulares S.A.U.n, bi enpresa hauetan hitzarmenak iraungiak daudelako.

-Uler dezazuela zuen egungo zuzendaritza taldeak burutu nahi izango lukeen edozein neurri antisozialari langileok erantzungo diogula, aurreko saiakerei erantzun genien antzera, langile-klasearen interesak defendatzeko tresnarik eraginkorrenekin, alegia. Horrengatik, gogorarazi nahi dizuegu “egungo zuzendaritza talde osoa kargutik kentzeko” egin eskaria, zeina honako pertsonez osatua dagoen:
Guillermo Ulacia Arnaiz jauna, Juana Maria Fernandez andrea, Santiago Alonso jauna eta Roberto Urrutia jauna.

Eskaera, 2018ko maiatzaren 9an, aho batez aurkeztu zuen PRODUCTOS TUBULARES S.A.U.ko enpresa batzordeak, ondorengo terminoetan:
“… haiek heldu zirenetik ez dago gardentasunik, haien kudeaketa iluna da…, haiengan ez dugu ezertxo ere sinesten, GRUPO TUBOS REUNIDOS S.A.-ren etorkizunerako trabatzat eta egiazko arazotzat hartzen dugu”.

Berresten gara egungo zuzendaritza taldeak berehala, ahalik eta bizkorren, kargutik kentzearen harira egin eskaria bete behar dela.

Besterik gabe, agurtzen gara, taldearekiko betekizuna bete dezazuela eskatuz.