Behin baino gehiagotan salatu izan dugu Irun eta Hendaia arteko muga militarizatua pertsona migratuentzako heriotza zigorra bilakatzen ari dela. Urtea hasi denetik gutxienez 7 dira muga zeharkatzeko ahaleginetan hildako pertsonak. Gerra, pobretze eta miseriatik ihes egitera behartuta, gurera heldu eta Euskal Herrian inposatua den mugan gainditu ezineko oztopoak aurkitzen dituzte.
Poliziaren kontrol arrazistek, eta oro har migrazio politika hiltzaileen ondorioz, egunero muga zeharkatzeko haien bizia arriskuan jartzera behartuak dira migrazio prozesuan dauden pertsonak.
Borondate politiko falta nabaria da euskal instituzioen aldetik. Euskal Elkargoa zein Eusko Jaurlaritzak haien esku dagoen guztia egitetik urrun, hitz politetatik harago ezer gutxi egin dute errealitate gordin honi aterabide duina eskaintzeko. Kontrol polizialen aurkako jarrera irmoa eta berauek desagertzeko ekimen sendoak behar ditugu, baita bide seguruak eta harrera politika ausartak ere.
Neurri politiko instituzional ezaren aurre eginez, lan politiko militantearen bidez erantzuten zaio egunero krudelkeria arrazista eta kriminal honi. Asko dira lan militante horretan murgilduta dauden kideak. Eta Eñaut Aramendi LABeko kidea militante horietariko bat da. Arrazakeriari aurre egiteko antiarrazista behar dugula izan sinetsita, elkartasunez pertsona migranteei haien ibilbidea seguruagoa izan dadin lan egiten du Eñautek hamaika kideekin batera.
Horregatik, gaurko atxiloketa gogor salatzen dugu. Aramendi berak askatu ondoren esan duen moduan: “Delitu bakarra gaur ikusi dudana izan da frantses poliziarena, gelditu naute nire autoan hiru pertsona beltz ikusi dituztelako”.
Inor ez delako ilegala, Euskal Herria harrera herria izatea nahi dugulako, politika migratorio arrazistei aurre egin diezaiegun.