LAB, ELA eta ESK sindikatuok elkarretaratzeak egin dituzte Gasteizen (Txagorritxuko ospitalean), Bilbon (Basurtukoa) eta Donostia ospitalean Osakidetzan benetako konponbideak exijitzeko. Era berean, bat egin dute gaur arratsaldean OPA Osasun Publikoaren Aldeko herri plataformek deitutako mobilizazioekin.
OPA Herri Plataformek salatu dutenez, “zortzi hilabeteko lanaren ostean, osasun publikoaren defentsan funtsezkoak diren eragile sozial eta profesionalak baztertzea izan da Osasun Itunaren jomuga, unibertsitate pribatuei eta Confebask patronalari ahotsa eman zaien bitartean, hauen interesak osasunaren negozioari lotuta baitaude”. Plataformetatik kexu dira: “Prozesu hau opakoa eta antidemokratikoa izan da, arazo nagusiari heltzea saihestuz: pribatizazioa eta lankidetza publiko-pribatuko politikak”. Argitaratu duten oharraren arabera, Osakidetzaren krisian eta hondamenean gobernuak duen erantzukizuna ezkutatzeko aurpegia garbitze bat besterik ez da EAEko Osasun Ituna.
Salaketaz gain, osasun publikoaren aldeko plataformek osasungintza publikoa indartu eta pertsona guztien osasun eskubidea bermatzen duen osasun ereduaren proposamena egin dute, pertsona zaurgarrienei arreta berezia eskainiz. Neurrien artean: osasun %100 publikoaren aldeko konpromiso irmoa, elkarlan publiko-pribatua eta aparteko orduak arbuiatzea, osasun inbertsioa berehala handitzea Europako batez bestekoa lortzeko, Lehen Arreta lehenestea, arreta presentzial osoa berreskuratzea, gutxienez 15 minutuko kontsultarako denborekin eta gehienez bi eguneko atzerapenekin, plantilla nahikoa eta egonkorra bermatzea profesionalen ihesa saihesteko, itxaron-zerrendak nabarmen murriztea baliabide propioekin eta kontrol publikoarekin, osasun-sistemaren kudeaketa demokratikoa, parte-hartzailea eta gardena, eta Tolosaldean eskualdeko ospitale publiko bat sortzea.
Euren ustez, “neurri zuzentzaileen gabeziaren eta politika pribatizatzaileen jarraipenaren aurrean, beharrezkoa da presio soziala mantentzea, Eusko Jaurlaritzari exijitzeko herritarren gaitzespena entzun dezala eta osasun publikoak pairatzen dituen egiturazko arazoei benetako irtenbideak bila diezazkiela”.
