Gaur goizean agerraldia egin du Mikel Irujo Industria kontseilariak datorren Industria legearen prestaketan egindako azken aurrerapenen berri emateko. Horrelako agerraldien titular arranditsuez landara, LAB sindikatuak foru legearen behin betiko zirriborroa jasotzeari itxaronen dio, behar bezala aztertu eta baloratzeko, baina ohartarazi nahi du Industria Federazioko delegatuak aktibatuak dituela Nafarroako Gobernuari exijitzeko sektorean trantsizio ekologiko baten bidean jar dadila, sektorearen etorkizuna bermatuko duena, kalitatezko enplegua defendatuko duena eta aberastasuna banatuko duena.
LAB sindikatuak hilabeteak daramatza azpimarratzen aukera badagoela Nafarroako gehiengo sozialaren egungo egoera hobetzeko, etorkizuneko erronka handien aurrean egiturazko aldaketak gauzatzeko anbizioa aldarrikatuz. Eta egungo egoera hobetzeak esan nahi du atzean utzi behar direla jarrera autokonplazienteak, eta aurrera egin behar dela Nafarroako langileen bizi eta lan baldintzak duintzeko bidea. Horregatik, positiboa da Maria Txibite Nafarroako Gobernuko lehendakariak eta Mikel Irujo Industria kontseilariak ere legegintzaldi honetako lehentasunei aurre egiteko anbizioaz hitz egiten hastea.
Industria indartzea eta eraldatzea da lehentasun horietako bat, sektorearen etorkizuna horren esku baitago. Horrela, LABek egoki eta estrategikotzat jotzen du sektorearen beharrezko trantsizio ekologikoari ekitea etorkizuneko Industriari buruzko foru legearen inguruko eztabaidaren bidez, Nafarroako ekonomian, lurraldean eta langileengan duen pisua kontuan hartuta.
Nafarroako Gobernuak eskura ditu hilabete hauetan LAB sindikatuak egindako ekarpenak eta lana. Ekainean, LAB sindikatuko Industria Federazioko dozenaka delegatuk beraien konpromisoa eta determinazioa erakutsi zuten, sektorearen etorkizunari eta haien lanari balioa emateko. Orain, Nafarroako Gobernuak erakutsi behar du baduela anbizioa, beti aseezinak diren enpresariek jartzen dituzten zailtasun eta oztopoen gainetik, kalitatezko enplegua bermatuko duten aldaketak ezartzeko eta Nafarroako industriako milaka langileek sortzen duten aberastasuna behar bezala banatzeko.