Zuzendaritzak negoziazioan erakutsitako harrokeria eta arduragabekeria salatzeko Lantegi Batuak-eko langileek Bilboko kaleak hartu zituzten larunbatean. “Lantegi Batuakeko langileok borrokan. Por un convenio justo” lelopean eta Enpresa Komitearen deiari jarraituz, gaurdainoko jarrera aldatzeko eskaera egin zioten zuzendaritzari, eta erantzuk positiborik jaso ezean mobilizazio berriak iragarri zituzten.
LANTEGI BATUAK fundazioan 2021 langile dira. Diru publikoa jasotzen duen enpresa bat da eta Aniztasun Funtzionala duten pertsonak lanerako gaitasuna eskuratzea eta lan mundu arrunterako sarbide izatea du helburu.
Hitzarmena negoziatzen hasi zirenetik enpresaren aldetik harrokeria eta arduragabekeria baino ez dute jaso langileek. Soldatak igo nahi ez eta murrizketa sozial basatiak proposatu ditu zuzendaritzak.
Horregatik mobilizazioetan hasteko erabakia hartu dute, “jakin badakigu enpresa honetan kalera ateratzeak berebiziko garrantzia duela. Garen kolektiboagatik zein enpresari berari bere lan soziala zikintzeak eragiten dionagatik” adierazi dute. Larunbatean egindako manifestazioaren ostean erantzun positiborik jaso ezean mobilizazio berriak izango direla iragarri dute Enpresa Komitetik. Enpresa Komitea ELA, LAB, CCOO eta UGT sindikatuetako delegatuek osatzen dute.