LAB eta CCOO sindikatuon oharra:
EEEa hasi zenetik langileok zein komitean ordezkaritza dugun LAB eta CCOO sindikatuok argi azaldu dugu gure jarrera: ez dago arrazoirik SuperBerriak-eko lau dendak (BM Shop frankizia) itxi eta 70 lanpostu suntsitzeko. Horregatik irailaren 10ean burututako langile asanbladan erabaki genuen enpresak Enplegu Erregulazio Espedientea (EEE) atzera bota ezean irailaren 16an greba mugagabea abiaraziko genuela.
Ostiralean, irailaren 16an, enpresak kaleratze kolektiboa bertan beheraez uztean, greba mugagabeari ekin genion. Atzo, irailak 20, enpresak EEEa bertan behera utzi duela adierazi digu. Gauza bat argi daukagu: Enpresak EEEa atzera bota badu, gure borroka eta greba mugagabeari beldur diolako izan da. Bost greba egun hauetan grebaren jarraipena ia %100ekoa izan delako, denda guztiak itxita egon direlako eta langileon borrokarako determinazioa erabateko izan delako. Dendaz denda burututako piketeak, bezeroen elkartasuna, denden aurrean egindako bilkurak, Laudion burututako manifestazio jendetsua eta herri, eskualde zein bestelako lantokietatik zein jasotako elkartasun keinuak erabakigarriak izan dira. Batasuna, antolakuntza eta ekintza sindikala.
Lehenengo helburu hau lortuta, hasieratik esan bezala, bertan behera utziko dugu greba mugagabea. Hala ere, hau ez da hemen amaitu: enpresaren aktibitatea eta gure lanpostuak mantentzeko konponbideak aztertzeko unea da eta horretarako SuperBerriak zein BM enpresekin harremanetan mantenduko gara. Enpresaren aktibitatea zein gure lanpostuen mantentzea bermatu arte, erne, antolatuta eta borrokan jarraituko dugu.
Aurreko ohar batean zabaldu bezala, SuperBerriak-ek Enplegu Erregulazio Espediente prozedura abiatu zuen irailaren 7an. SuperBerriak enpresak lau BM Shop frankizia ditu, Ugaon, Laudion, Amurrion eta Bilbon. Lauek ondo funtzionatzen dute eta horren erakusgarri da erabaki honek langile, bezero zein auzokideen artean sortu duen harridura. Lehen negoziaketa bileran enpresak aurkeztutako dokumentazioa, eskasa izateaz gain, argi-ilunez beteta zegoen eta enpresak ostera aurkeztu duen informazio ere bide beretik joan da. Edonola ere, ez dituzte EEEa justifikatuko luketen arrazoi ekonomikoak frogatzen.
LABek eta CCOOek argi dugu SuperBerriak-ek ardura bat daukala bere langileekiko, eta beraz, jarduera utzi nahi baldin badu, dendentzako eroslea bilatu beharko duela, lanpostu eta langileekiko erantzukizunez jokatuz.
