Askotarikoak dira Grezian (Lesbos eta Chios irletako mobilizazioak adibidez) eta Europa guztian (LAB kide den Herrien Auzitegi Iraunkorra kasu) antolatzen ari diren elkartasun eta salaketa ekimenak. Beharrezkoa da Euskal Herritik ere gure elkartasuna adieraztea eta gertatzen ari den egoera salatzea. Horregatik, LAB Sindikatuak martxoaren 14an eta 15an deitutako mobilizazioetan parte hartzeko deialdia egiten du.
Gerra inperialistak eragindako egoera latza luze doa Sirian. 9 urte irauten ari den gerrak milioika pertsona mugiarazi ditu euren bizilekuetatik, oinarrizko giza eskubideak urratuz eta interes ekonomikoak pertsonen gainetik jarriz. Azkenaldian pertsona migrante eta errefuxiatuen kontrako erasoak ugaritu egin dira Turkia eta Greziaren arteko mugan. Atxiloketak, erailketak, bortxaketak eta oro har, giza eskubideen kontrako erasoak konstante bat badira, azkeneko asteetan biderkatu egin dira. Pertsona migratzaileez gain, elkartasuna ere kriminalizatzen ari dira; horren adibide garbia da pasa den asteetan Zaporeak proiektuak jasandako eraso faxista.
Egoera honen aurrean, ezinbestekoa da pertsona migrante eta errefuxiatuek jasaten dituzten erasoekin bukatzea eta egoera errotik eraldatzeko agenda bat martxan jartzea. Horretarako 3 egoera hartu behar dira kontuan:
• Siriak, Kurdistanek eta oro har, ekialde hurbileko herrialdeek pairatzen dituzten gerra inperialistekin bukatzea. Herri horien burujabetza errespetatzea eta kanpo injerentziekin amaitzea baldintzarik gabeko printzipio bat izan behar du.
• Migrazio bideetan ematen diren giza eskubideen urraketekin amaitzea. Emakumeak dira, batez ere, egoera hauek gehien sufritzen dituztenak. Indar polizialek darabilten biolentziaz gain, bereziki salatzekoa da Greziak eta Hungariak asilo eskubidea bertan behera utzi izana azkeneko asteetan. Nazioarteko legediaren kontra doan neurri bat da, muga fisikoen kontrola, militarizazioa eta gotortzea bilatzen duena. Pertsona migranteak Turkiaren eta Europar Batasunaren arteko “presio” elementu soil bat dira momentu honetan, negoziaketa diplomatikoen gatibu.
• Azkenik, langile migrante eta errefuxiatuak gure gizarteetan modu duinean bizitzea helburu duten politika publikoak inplementatzea. Bide horretan, bereziki garrantzitsua da langile migranteek pairatzen dituzten prekarietate, pobrezia eta bazterketa egoerekin bukatzea eta faxismoari eta arrazakeriari aurre egitea.
Askotarikoak dira Grezian (Lesbos eta Chios irletako mobilizazioak adibidez) eta Europa guztian (LAB kide den Herrien Auzitegi Iraunkorra kasu) antolatzen ari diren elkartasun eta salaketa ekimenak. Beharrezkoa da Euskal Herritik ere gure elkartasuna adieraztea eta gertatzen ari den egoera salatzea.
Horregatik guztiagatik, LAB Sindikatuak martxoaren 14an eta 15an deitutako mobilizazioetan parte hartzeko deialdia egiten du:
• Bilbon: martxoak 14an 18retan Moyua Emparantzan.
• Iruñan: martxoan 14an 18retan Autobus geltokian.
• Donostian: martxoak 14an 18retan Boulevarden.
• Gasteizen: martxoak 15ean 13tan Artiumen.
Langileon arteko elkartasun internazionalistaz, gerra inperialistarik ez! Langile migranteen eskubideak errespetatu! Ongi etorri errefuxiatuak!