«Burla gutxiago: edo enplegu duina edo prestazio duinak eta mugagabeak»

LAB sindikatuaren balorazioa PP, CCOO, UGT eta CEOEk iraupen luzeko langabetuentzako laguntza “berri” bat sinatu dutenen akordioaren aurrean.

Laguntza berriari dagokionez:

1/ Azken urteotan onartutako PRODI (langabetuen babeserako aldibaterako programa) eta PREPARA Planaren bertsio berri baten aurrean gaude. Programa hauek ez zuten balio izan langabetuen babes iraunkorra bermatzeko, ezta haiek lan munduratzeko ere. Goitik beherako porrotak izan ziren. Datuek argi eta garbi erakusten dute. Babesik gabeko langabetuen kopurua hazi baino ez da egin 2009az geroztik. Egun, Hego Euskal Herrian langabetuen % 54,5-ek ez du inongo prestazio ekonomikorik.

2/ Madrilen adostutako laguntza berriak orain arteko plan guztien akatsak eta gabeziak ditu:

• Behin-behikotasuna: behin bakarrik laguntza hau jaso ahal izanen dute 6 hilabetez.

• Ez da iraupen luzeko langabe guztientzako: bakarrik jasoko dute kargupeko senideren bat dutenek.

• Zenbateko eskasa: 426 euro hilabetero. Langabetuek jasoko duten diru-kopurua erabat eskasa da duintasunez bizi ahal izateko eta eguneroko beharrei (etxebizitza, elikagaiak,…) aurre egiteko.

• Gabezia denbora: langabetuak gutxienez 6 hilabete pasa beharko du diru-laguntzarik gabe.

• Langabetuak susmopean. Langabetuak enplegu bat aktiboki bilatzeko konpromezua sinatu beharko du, horren inguruan zalantzak egonen balira bi urtez langabezian egon ondoren.

3/ Laguntza berriarekin beste behin ere jauzi kualitatibo bat ematen da enpresak diru-publikoz finanziatzeko orduan, enpresei inongo kontrapartidarik eskatu gabe. Enplegurako estimulazioaren aitzakiarekin, enpresariak 426 euro deskontatu ahal izanen ditu iraupen luzeko langabetuak kontratatuz gero. Gauzak horrela, langilearen soldata enpresaren eta enplegu zerbitzuaren artean kofinantziatuko da. Langabetuentzako diru-publikoa enpresen eskuetan bukatuko da. Praktika honek, soldata baxuen eta lanaldi partzialen enpresen legea nagusi denean, suposazten du doako enplegua patronalarentzat. Desberdintasun sozialak areagotzeko beste urrats bat.

4/ Negoziazio honetan izandako sekretismoak argitu gabe utzi du zer gertatuko den Nafarroako Inklusio Sozialerako Errentarekin eta Araba, Bizkaia eta Gipuzkoako Diru-Sarrerak Bermatzeko Errentarekin, batez ere, Madrileko laguntza eskasak osatzeko orduan.

Akordioari dagokionez, erabat deitoragarria iruditzen zaigu, besteak beste, CCOO eta UGT argazki berean egotea murrizketen, eskubide sozialen txikitzearen eta lan erreformaren Gobernuaren ondoan. Are gehiago, akordioaren edukinari erreparatuta, huts egindako antzeko programen errepikapena sinatu dutelako. Beste behin ere, langabetuak erabiltzea, hutsaren hurrena den PP-ren izaera soziala saltzeko, eskandalu handi bat da.edo enplegu duina edo prestazio duinak eta mugabeak.