Lehenik eta behin, LABek bere elkartasuna adierazi nahi die gaur eguerdian Azpeitiko Glual Energy enpresan hilda aurkitu duten 50 urteko langilearen senide zein gertukoenei. Heriotza bakoitzaren atzean dagoen minarekin jasaten dutenei babesa emateaz gain, beharrezkoa dugu gure buruari galdetzea zer den gertatzen ari dena. Gure ustez, lan munduaren prekarizazioaren ondorioa da lan munduan bizi dugun sarraski etengabea.
Nola liteke urtea hasi zenetik 42 pertsona hil izana lan istripuetan? Zer industria aurreratu saldu nahi digute heriotz gehienak industria sektorean gertatzen ari direnean? Heriotza hauen atzean, enpresetan gastuak murrizteko erabakia dago, bai, prebentzio neurriak ezartzerakoan eta baita ere lan baldintzak prekarizatzean. Baina hau horrela da, horrela jarduten duten enpresariek atzean babes instituzionala dutelako.
Heriotz bakoitza era isolatuan ulertzea akatsa larria litzateke, lan munduaren prekarizazio prozesuaren ondorio baitira. Euskal Herriko ekonomia inoizko aberastasunik gehien sortzen ari denean, lan istripu eta istripuen ondoriozko heriotz kopuruak lotsa sentiarazi beharko liguke jendarte moduan.
Sindikalgintzatik deialdia egiten diogu jendarteari lan istripu eta prekarietatearekin salatzeko mobilizazioetan parte har dezan. Gehiengo sindikalak (ELA, LAB, ESK, STEILAS, EHNE eta HIRU) kontzentrazioa egingo du datorren asteartean, hilak 29, goizeko 11:30etan Azpeitiako Glual enpresaren atarian.
Lan istripuak eta horren atzean dagoen prekarietatea erabaki politikoen ondorio denez, lehen mailako arazo politiko bilakatu behar ditugu.