Atzo martxoak 23, Lodosako GERMINADOS COMPOST enpresako 55 urteko T.PT langilea hil zen Nafarroan, lan istripu traumatikoan. Lan istripua lastozko fardoak zeramatzan kamioia deskargatzeko lanetan ari zela gertatu da. Deskargatzen ari zen fardo horietako batzuk harrapatuta hil da. LABetik gure doluminak eta babesa helarazi nahi diegu hildakoaren familia, lagun eta lankideei.
2015an Euskal Herrian gutxienez 4 langile hil dituzte euren lanpostuetan edo horien ondorioz: 2 Bizkaian eta 2 Nafarroan.
Lan istripuak patronalak lan egiteko orduan ezartzen dizkigun baldintza eta lan egiteko moduen emaitza dira. Izan ere, sektore horretan nagusi diren azpikontratazioak, prekarietateak, esplotazioa, lan baldintza txarrek eta lan erritmoak hil egiten dute.
Enplegua suntsitzen ari den eta jarduera ekonomikoa gainbehera etorri den ataka ekonomiko honetan, enpresek batetik prebentziorako inbertsioak murriztu dituzte, eta bestetik, lan osasuna eta segurtasuna galtzea eta kaltetzea eragiten dituzten egoerak sustatu dituzte.
Berriki LAB sindikatuak argi utzi du heriotza istripuen kopuruak onartezinak izaten jarraitzen dutela, sei minuturo lan ezbehar bat gertatzen dela, eta langileen heriotzari lotutako datuen jeitsiera ez dela lan baldintzek eta osasunak hobera egin dutelako, baizik eta jende gutxiagok lan egiten duenez, istripuen kopurua orokorra urritzen delako.
Langileok laneko gaixotasunekiko, eta lan istripuekiko TOLERANTZIA ZERO aldarrikatu eta adierazi behar dugu. Arazo horiekin bukatzeko eredu aldaketa bultzatu behar dugu, gure osasun eskubidea egiazkoa izan dadin aldaketa politikoa, ekonomikoa eta soziala aldarrikatuz. Horrexegatik sustatu nahi du LAB sindikatuak LAN HARREMANETARAKO ETA BABES SOZIALERAKO EUSKAL ESPARRUA sustatuko duen bestelako EREDUA.