Gaur, urriak 15, Donostian Euskal Herriko txoko guztietatik joandako 40 langilek IREKI ekimena aurkeztu dute, “langileen bultzadaz euskal preso eta iheslariak etxeratze bidean jartzeko” asmoz. Helburu horren bila sinadura bilketa iragarri dute, “inoiz Euskal Herrian egin den sinadura bilketarik erraldoiena”, 150.000 sinadura biltzeko erronka jarrita.
Azken urteetan —bereziki duela 5 urte ETAk behin-betiko su-etena iragarri zuenetik hona— preso eta iheslarien gaian eragiteko lan munduan izaniko mugapenak gainditzeko beharra dagoela adierazi du IREKIk. Eta LABetik ere gauza bera diogu, gehiago egin beharra dago eta zentzu horretan datorren ekimen oro ongi etorria izango da. Aurtengoa preso eta iheslarien gaiari dagokionez urrats berri eta erabakigarriak emateko urtea izan behar du, indarrak metatuz, lan mundua astinduz, langileen protagonismotik, eta eragile sindikalon konpromisotik.