LAB sindikatua Ibaigane Ikastetxearen kudeatzaileek iragarritako itxieraren kontra mobilizatzen ari da. Egoera konpontzeko nahiarekin bai Hezkuntza Sailari bai Kristau Eskolari bilera eskaera egin dien arren ez du erantzunik jaso oraindik. LABek ikastetxea zabalik mantentzeko dauden aukerak azter daitezela exijitzen du.

Gizarte Ekimeneko LABen oharra
IBAIGANEKO LANGILE ETA FAMILIAK AURRERA!!

«Orain dela bi aste, Ibaigane Ikastetxeko kudeatzaileek iragarri zuten zentroaren itxiera. Ordutik langileek haien etorkizunaz ez dute berririk izan, ez Hezkuntza Sailetik, ez Kristau Eskolatik.

LAB Sindikatuak gogor salatu nahi du hartutako erabakia eta bat egiten du langileek egiten ari diren kontzentrazioekin.

Beste aldetik, LAB sindikatuak bilera eskaera egin die bai Hezkuntza Sailari bai Kristau Eskolari, baina erantzunik ez dugu jaso; jakin badakigu hartutako erabakia alde bakarrekoa izan dela familiak eta langileak kontuan hartu gabe.

LABen helburu nagusia enpleguaren defentsa izan da beti; KALERATZERIK EZ EGOTEA, LANGILE GUZTIEN BIRKOKAPENA ETA LAN HITZARMENA SEKTOREKO LANGILE GUZTIENTZAKO eta horrela jakinarazi genien maiatzaren bukaeran Gizarte Ekimeneko patronal guztiei enpleguaren aldeko akordioa eskainiz.

Kasu honetan, Kristau Eskola eta Ibaigane Fundazioari exijitzen diegu Ibaiganeko langile eta familien aldarrikapenari erantzuteko eta ikastetxea zabalik mantentzeko dauden aukerak azter ditzatela. Beste aldetik, Hezkuntza Sailaren eskuetan dago ikastetxe honetan diru publikoaren kudeaketa eskasaren jarraipena egitea eta erantzukizunak eskatzea.

LAB sindikaturen ustez langileen ordezkari guztiok batera joan behar dugu afera honetatik atera ahal izateko. »