Gaur, hilak 23, LAB Sindikatua Eusko Jaurlaritzaren Enplegu eta Gizarte Gaietarako sailburu berriarekin, Ángel Toñarekin batzartu da. Bertan, LABek derrigorezko jotzen duen enplegu politiketan eta babes sozialean eman beharreko norabide aldaketa eta hau gauza dadin hartu beharreko neurriak azaldu dizkio.

Azken bi urteotan enplegu eta pobreziarekin gertatutakoaren aurrean aurpegi berriak baino zerbait gehiago beharko dela deritzo LABek. Norabide aldaketa derrigorrezkoa da.

Hainbat galdera airean daude: lan mundua eta babes sozialari buruzko politikak lan sailetik diseinatuko dira edo botere ekonomikoak marraztuko ditu orain arte bezala? Toña jaunak biderik izango al du Jaurlaritzak aurrera daraman bidean enplegua eta babes soziala benetan indartzeko politikak burura eramateko?

LABek bere prestutasuna adierazi dio Enplegu Sailburu berriari lan mundua berrantolatzeko eztabaida egiteko. Horretarako, eta bere garaian egin bezala, Angel Toñari gure proposamena helarazi diogu, lan harreman eredu eta babes sozialerako eredu berrirako proposamena. Pobreziaren aurkako borroka ere lehentasunezkoa da sindikatuarentzat.

Elkarrizketa sozialeko mahaiaren ibilbidea zein izango den argitu beharko du ere, mahai hau ez baita lan munduko benetako arazoei erantzuteko sortu ez ta ere sakoneko eztabaidei ekiteko. Amaitzeko, LABek argi du ere, politikak langileok behar dugun norabidean jartzeko, lehenik eta behin, zer nolako lan harreman eta babes sozial eredua nahi dugun eztabaidatu eta erabaki behar dugula.

Euskal Herria, 2015eko otsailak 23