LABek Tubos Reunidosen aurkeztutako erregulazioko espedientea bertan behera uztea exijitu du, eta salatu du zuzendaritzak bere kudeaketa negargarriaren ondorioak plantillei ordainarazi nahi dizkiela.
LABeko Tubos Reunidoseko atal sindikalek, Trapagaranen eta Amurrion, enplegu erregulazioko espedientea eta zuzendaritzak planteatutako lan baldintzen funtsezko aldaketa berehala kentzeko eskatu dute gaur, negoziazio mahaiaren lehen bileraren ondoren.
Tubos Reunidoseko zuzendaritzak jakinarazi du 301 langile kaleratzeko asmoa duela EEE baten bidez, enpresaren etorkizunerako ezinbestekotzat jotzen duen neurri gisa. Neurri hori bideragarritasun plan berri bati lotuta dago, eta enpresak berak aitortu du plan hori sei hilabete baino gehiagoz lantzen aritu dela enpresa batzordearen eta eragile sozialen ordezkaritzaren parte hartzerik gabe, eta plantillari bizkar emanda.
LAB sindikatuaren ustez, onartezina da kaleraketetan oinarritutako plan berri bat planteatzea, aurrez 2020–2026 aldirako indarrean dagoen bideragarritasun planaren ebaluazio zorrotzik egin gabe. Horregatik, LABek EEEa berehala bertan behera uzteko exijitu du eta enpresari formalki eskatu dio indarrean dagoen planaren betetze mailaren balorazio zehatza aurkezteko, zehaztuz zein helburu bete diren, zein ez, eta garapenean zehar zer erabakiak hartu diren.
Astelehen honetan egindako bileren ondoren, LABek ohartarazi du zuzendaritzak proposatutako neurriak ekoizpen ereduaren berregituraketa sakon batera bideratuta daudela, altzairutegiaren etorkizunerako ondorio oso larriak izan ditzaketenak. Enpresak modu esplizituan adierazi ez badu ere, sindikatuak gardentasun falta nabarmena salatu du, eta plantillari enpresa planen benetako irismenari buruzko informazio osoa eta egiazkoa helaraztea eskatu du.
LABek, halaber, azpimarratu du Tubos Reunidosen egungo egoera ezin zaiela kanpoko faktoreei soilik egotzi, baizik eta urteetan zehar pilatutako enpresa erabakien ondorio dela. Gogorarazi du enpresak diru laguntza publiko handiak jaso dituela, zenbait garaitan dibidenduak banatu dituela eta une kritikoetan babes instituzionala izan duela; horregatik, bidegabea iruditzen zaio orain langileek kaleratze eta lan murrizketen bidez ondorio horiek bere gain hartu behar izatea.
Sindikatuak berriro adierazi du enplegua suntsitzea edo lan baldintzak prekarizatzea dakarren edozein neurriren aurkako jarrera irmoa, eta defendatzen du irtenbide bakarra plantillen antolakuntza eta mobilizazioa direla.
LABek azpimarratu du jokoan dagoena ez dela soilik ehunka langileren enplegua, baizik eta bi eskualde osoren etorkizun soziala eta industriala. Horregatik, gatazka honen aurrean euskal erakundeei benetako inplikazioa, erantzukizuna eta konpromisoa exijitzen dizkie.
LABek lanean eta mobilizatzen jarraituko du Tubos Reunidoseko plantillen enplegua, ehun industriala eta etorkizuna defendatzeko.