Sektorean 3. indarra izatera pasa da azken negoziazio prozesutik.
Gaur, urtarrilak 26, Arabako Metaleko hitzarmena berritzeko mahai negoziatzailea osatu da. Aldaketa esanguratsuena LAB-ek izan dugun bilakaera izan da. Izan ere, aurreko hitzarmenean 4garren indarra baginen, oraingo honetan 3garren indar bezala ekingo baitiogu negoziazio prozesuari. Sektoreak LAB-ek izandako jarrera saritu egin du, bere delegatuen kopurua sektorean %40 handitu delarik.
Azken hilabeteetan LAB-ek bere ordezkari eta militanteekin batzarrak burutu ditu, inkestak jaso ditu enpresaz enpresa eta mahai negoziatzailean defendatuko dugun plataforma eratu dugu. Arabako metaleko sektorean milaka dira lan zentro eta tailer txikietan lan egiten duten langileak. Sindikatuok gai izan behar dugu tailer hauetako langile guztiei eskaintza sindikal eraginkorra egiteko, eta beren eskubideak eta lan baldintzak hobetzeko markoak eskaintzeko. LABentzat sektoreko hitzarmena da erreferentzia, eta hortik gora, enpresa-batzorde eta delegatuei tresnak eskaintzen dizkiegu hitzarmena hobetzen jarraitzeko. Enpresaz enpresako negoziazioetara mugatzeak babes gutxien duten langileak bazterrean uzten ditu, prekarietatera bultzatuz eta euren egoera betikotuz.
Patronalak ez digu ezer oparituko, eta arrankatzea lortzen dugun eskubide bakoitza borrokaren bitartez izango da. Horregatik, eta datorren negoziazio prozesuaren aurrean, beharrezkoa izango da langileak aktibatzea eta borroka egiteko prest egotea. Norberak bere erantzukizuna ez hartzea, ez da aukera bat. Bai sindikatuok, eta baita langileok ere. LAB prest dago dagokion papera jokatu eta irmoki, koherentziaz eta langileon babesarekin sektoreak behar eta merezi duen hitzarmena lortzeko erronkari egiteko. Erantzukizun osoz. Aldi berean, gainontzekoei ere egokitzen zaien erantzukizuna har dezaten exijituko dugu.
Hurrengo bilera, otsailak 9an izango da. Bertan, LAB-ek bere afiliatu eta militanteekin azken hilabeteetan eratutako plataforma aurkeztuko du mahaian, sektoreak dituen beharrei era merezi duenari erantzungo diona.