Atzo, apirilak 7, Bizkaiko anbulantzien gatazkan ari den bitartekariarengandik sindikatuek jasotako azken proposamenaren inguruko erreferenduma egin zen eta langileen gehiengoak ontzat eman zuen. Aurreko proposamenari LABek eta langileen asanbladak ezezkoa eman ostean, proposamen berri honek onura asko jasotzen ditu, beste beste, lan erreformaren aurrean hitzarmena blindatzen dituzten klausulak. Gogora behar da langileak greba mugagabean daudela pasa den martxoaren 10etik.

Proposamenak jasotzen duena

– 2014-2016 indarraldia.
– Lan erreformaren aurrean hitzarmena blindatzen duten klausulak (ultraaktibitatea, hitzarmena ez betetzea eta malgutasuna).
– Etorkizunean EAE osoan ezarriko den hitzarmen kolektibo bat negoziatu eta adosteko konpromiso irmoa.
– 2015ean (KPI+0,3) eta 2016an (KPI+0,3) KPIari lotutako igoerak.
– Ahalbidetzen du 2013rako, langile berriek zein USOk soilik sinatutako eragin mugatuko hitzarmenerakin bat egin ez dutenek, aipatu hitzarmenak zehazten duen soldata igoera berreskuratu ahal izatea.
– Guardiak arautzea.

Hitzarmen honek 2008-2012 aldirako USO sindikatuak sinatu zuen eragin mugatuko hitzarmena hobetu egiten du.

LABetik, positiboki baloratzen dugu bitartekariak egindako proposamena, 2014rako eta 2015eko lehen seihilabeterako (KPI + 0,3 gehituko da) %3ko soldata jaitsiera jaso arren. Kontuan hartu behar dugu gehiengoa duen USO sindikatuak 2013an %8ko soldata jaitsiera adostu zuela, eta urte honetarako, %8ko jaitsiera onartzen jarraitzen zuela, pasa den astean argi geratu zen bezala, bitartekariak egindako lehen proposamena babestu zuenean. Gainera, gaur egun, enpresa unilateralki ari da %12,36ko soldata jaitsiera eta estatuko hitzarmena ezartzen. LABek, egoera eta aurrekariak ikusita, ulertzen du langileek eros-ahalmena berreskuratzen dutela eta 2015 eta 2016 urteetarako KPIaren gainetik dauden igoerak izango dituztela.

Aipatu proposamenak langileen babesa izan du atzo burututako erreferendumean, 243k proposamenaren alde bozkatu dute, 62k kontra eta boto zuri 2 eta baliogabe 1.

Sektoreko langileek eramandako borroka eredugarriak lortu du sektoreko enpresak eta administrazioa mugiarazi eta proposamen berri hau lortzea. Beste behin ere argi geratu da borroka dela bide bakarra lan erreforma neutralizatzeko eta gure eskubide laboral eta sozialetan aurrera egiteko.

Araba
Ez dugu ahaztu nahi Araban gatazkan jarraitzen dutela sektoreko eragin osoko hitzarmena lortzeko. Egoera honetan autonomia elkarte mailako hitzarmenaren beharrizana argi ikusten da, hiru herrialdeetako langileen baldintzak araute eta berdinduko dituena. LABetik lanean jarraituko dugu aukera hau egia bihurtu ahal izan dadin ez oso epe luzean.