2024-06-17
HomeIndustriaMetalgintzaAurreikusi genuena bete da: enplegu suntsiketa Siemens-Gamesan

Aurreikusi genuena bete da: enplegu suntsiketa Siemens-Gamesan

Atzo UGT, CCOO eta ELAk sinatu zuten aurreakordioak, enplegu bermea zehaztea falta delarik, argi uzten du ontzat eman dela multinazionalak egindako irakurketa, alegia, enpresa egoera zailean dagoela, eta horren ondorioz, enplegu suntsiketa handia emango dela.

Aurreakordio honek argi uzten du, era berean, ez zegoela inolako arrazoirik horretarako, ez baita zehazten ez enpresa utzi beharreko langile kopurua, ez kaleratzeak egongo diren lantokietako antolakuntzan zer eragin izango duten ere. Txeke zuria eman zaio enpresari. Ez dago inolako zehaztasunik, ez seriotasunik ere. Esaterako, LABek ordezkaritza duen Arazuriko lantegian 11 kaleratze proposatu zituzten, eta kaleratze horiek ez zutela inolako justifikaziorik agerian geratu da. Orain ez dute kaleratzerik planteatu, LABek eskatzen zuen bezala.

Are gehiago, abenduan egin zen Europako Komiteko bileran, argi gelditu zen Euskal Herriko lantokietan ez dagoela inolako langilerik soberan, kontrakoa baizik, izatekotan, langile falta zegoela.

LAB ez da izango oztopo, edozein arrazoi medio, plan horretara apuntatu nahi duten langileentzat, baina ezin dugu ontzat eman enpresak inposatu nahi duen enplegu suntsiketa, eta horrek ekarriko dituen gelditzen diren langileentzat lan karga igoera eta estresa. Siemens-Gamesa Euskal Herriko industriarentzat enpresa estrategikoa izan beharko litzateke lan egiten duen merkatuagatik, enplegu zuzen eta zeharkakoaren sortzaile, eta ez enpleguaren deuseztatzaile.

Azkenik, jakinarazi nahi dugu idatziz eskatu diogula enpresaren zuzendaritzari izandako negoziazio horrek izan duen izaera juridikoa argitzeko LAB negoziaketatik kanpo uzteko. Hau da, jakin nahi dugu hasieran aurkeztutako EREa erretiratu zuten definitiboki edo ez, ulertzen dugulako LABen askatasun sindikalerako eskubidea urratu dutela. Aste hau bukatu baino lehen erantzun argia exijitzen dugu. Ez dugu LABen zilegitasuna auzitan jartzea onartuko, Euskal Herrian duen babesa kontuan hartuta. Espainiako negoziazio eremua ezin dugu ontzat eman naturaltasunez bertan sindikatu abertzaleak galtzaile garelako beti.

 

 

 

AZKEN ALBISTEAK | ÚLTIMAS NOTICIAS

Udal administrazioan euskararen normalizazioa mugatu nahi duen azken epaia gogor salatzen dugu

Euskal administrazioa euskalduntzeko prozesuaren aurka pairatzen ari garen oldarraldiaren baitan beste epai baten berri jaso dugu. Kasu honetan, Bilboko Administrazioarekiko Auzien Epaitegiaren eskutik etorri da; izan ere, Galdakaoko Udaleko Gizarteratzeko eta Laneratzeko Teknikari lanpostu bat egonkortzeko prozesuan 3. hizkuntza-eskakizuna ezartzea atzera bota du.

GUITRANSek Gipuzkoako errepide bidezko salgaien garraioaren hitzarmenaren negoziazioa blokeatuz gero, errepideak blokeatzeko deialdia egingo dugu

Gaur eratu dugu LAB, ELA, CCOO eta UGT sindikatuOk eta GUITRANS patronalak Gipuzkoako errepide bidezko salgaien garraioaren hitzarmenaren negoziazio mahaia. 2024 urtea hastearekin batera ekin genion sindikatuok hitzarmen berri baten negoziazio bideari. Izan ere, 2009ko abenduaren 31az geroztik hitzarmenik gabe dago sektorea eta lan-baldintza zeharo desarautuetan ari dira 6.000 langiletik gora.

Europako epaiak langileoi enplegu publikoa egonkortzeko borrokan beste tresna bat ematen digu

EBJA Europar Batasuneko Justizia Auzitegiaren sententziak argi uzten du administrazioek hartutako neurriek ez dutela behin-behinekotasunaren arazoa konpontzen eta neurri eraginkorragoak eskatzen ditu.