Langileok etxera bizirik itzuli nahi dugula aldarrikatu dugu gaur Iruñean egindako manifestazioan, enplegu duina eta kalitatezkoa exijitzeaz gain. LAB, ELA, ESK, STEILAS, EHNE, HIRU eta CGT sindikatuok deituta, Nafarroako lantokietan egin genituen atzo mobilizazioak, euskal gehiengo sindikalak Bilbon egindako elkarretaratzearekin batera. Bada, gaur, manifestazio jendetsua egin dugu Iruñeko kaleetan.

Nafarroan lan-ezbeharren egoerak nabarmen okerrera egin duela salatzeko deitu ditugu atzoko eta gaurko mobilizazioak. Hain zuzen ere, jarduera ekonomikoa eta langile kopurua baino gehiago hazten ari dira, eta azken hamarkadan jada ehundik gora dira heriotza eragin duten lan-istripuak. Aurten dagoeneko 16 dira hildakoak Nafarroan, hauetatik 12 azken bi hilabeteetan, horietako asko prekarietate egoera gordinean, edo erraz ekidin zitezkeen gertaeretan. Honez gero, 2018an joan den urtean baino gehiago dira bere lanpostuan bizitza galdu duten pertsonak Nafarroan.

Araba, Bizkaia eta Gipuzkoan gertatutako lan istripuak eta heriotzak ere salatu genituen atzo, euskal gehiengo sindikalaren izenean. Orotara, Hego Euskal Herrian, gutxienez 50 langile hil dira urtea hasi zenetik.