LAB parte den Euskal Herriko Emakumeen* Mundu Martxak VI. ekintza internazionalaren berri eman du gaur Donostian, eta ekintza hori Euskal Herrian nola lurreratuko den ere azaldu du. Hemen duzue agerraldian irakurritako testua:
Gaurko agerraldia Emakumeen* Mundu Martxako VI. ekintza internazionalaren berri emateko deitu dugu, eta ekintza hori nola lurreratuko dugun Euskal Herrian. Hogei urte baino gehiago dira bost urtean behin ekintza martxan jartzen dugula, eta aurten ere halaxe egingo dugu.
Aste honetan zehar, Euskal Herriko txoko ezberdinetan hainbat ekintza egingo ditugu eta “Herrien burujabetzak eta bizitza duinak” jarriko ditugu erdigunean. Mugimendu Feminista eragile sozio-sindikalekin batera, hilabeteak daramatzagu dena prestatzen, eta nazioarteko ekintzara batuz gai eta aldarrikapen hauek ekarri nahi ditugu mahai gainera.
Lurraren defentsan, mundu eta bizitza bizigarriak erdigunean jarri nahi ditugu klima larrialdi bete-betean aurkitzen garen honetan, non baliabide naturalen ustiaketa, biodibertsitatearen galera masiboa, lurren esplotazioa, etab. oso abiadura azkarrean gauzatzen ari den. Argi utzi nahi dugu, guzti hau planetaren ustiatze eta xahutzea oinarri duen gizarte-ereduaren ondorio dela, aipatutakoa bultzatu, sostengatu eta ahalbidetzen duten erakunde finantziario eta ekonomikoekin batera. Horregatik, Emakumeon* Mundu Martxatik, jendarte-eredu horretara bideratzen gaituzten eta arduradun diren erakunde ekonomiko zein finantziarioak interpelatuko ditugu. Hauek salatu eta bizi-eredu jasangarriago baterantz joan nahi dugula argi uzteko. Ahaztu gabe, ustiaketa hori ipar globalak hego-globalarekiko egiten duela eta, egun, hegoaldeko herrialdeak kolonizatzen jarraitzeko mekanismoa dela. Ezin dugu beste aldera begiratu. Bizi garen lurralde honetatik ere badugu erantzukizuna.
Era berean, Emakumeon* Mundu Martxatik, sistema zisheteropatriarkal kapitalista eta kolonialista honi zuzenean begiratzeko beharra mahagaineratu nahi dugu. Jendarte-egitura hau lur eta gorputz jakin batzuen gaineko esplotazioan oinarritzen da. Bazterreko subjektuak kolpatzen dituen sistema batean bizi gara, sistemak berak sortzen dituen eta etengabe erreproduzitzen dituen subjektuak. Non gorputz migratu zein arrazializatuak diren zapalkuntza hauen jopuntuan aurkitzen direnak, besteak beste.
Migrazio politikak mundu sistemaren egitura kolonialaren ondorio dira. VI. Nazioarteko Ekintza honetan, beraz, sistema hau sostengatu eta ahalbidetzen duten Estatuen arteko mugekin apurtu nahi dugula adieraziko dugu, hauek gorputz batzuen gain dominazioa eta indarkeria gauzatzeko tresna gisa ulertzen baititugu. Hori horrela, atzerritartasun legea bezalako politikak abolitzea urgentziazko neurrien artean kokatzen dugu, eta indarkerkeria eta arrazismo instituzionala salatu nahi dugu, baita egitura guzti hauek sostengatzeko bideratzen dituzten inbertsioak ere.
Hirugarrenik, indarkeria matxisten ildoari helduko diogu. Indarkeria matxistak egiturazkoak direla ulertzen baitugu, beste zapalkuntza sistema batzuekin batera, emakume eta gorputz disidenteen bizitza, gorputza eta sexualitatea kontrolatzeko, gizonek, gizon-taldeek, erakunde patriarkalek eta Estatuek tresna gisa erabiltzen dituztenak.
Aipatutako guztiari aurre egiteko, beraz, indarkeriarik gabeko gorputz eta lurraldeen alde antolatuko gara, feminismotik eragiten jarraituko dugu. Eta Euskal Herriko Emakumeon* Mundu Martxatik aste honetan zehar herrietan burutzen ari diren ekimenetara batzera animatzen zaituztegu: mobilizazioak, ekintza performatiboak, espazio publikoak hartu…
Horrekin batera, ezin aipatu gabe utzi Marsellako hitzordua. Ekainaren 13, 14 eta 15ean Europa mailako Nazioarteko VI. ekintza bertan burutuko da eta Euskal Herritik bertan izango gara ere.
Azkenik, larunbatean, Maiatzaren 10ean, Euskal Herriko ekintzan parte hartzera deitu nahi dugu Euskal Herriko Mugimendu Feminista, Bardean hasi eta Donostian amaituko dena. Tartean, Aramaio, Gernika eta Irun-Hendaia arteko zubitik igaroko gara hainbat ekintza eginez. Ekintza Donostian amaituko dugu manifestazio nazional batekin. Arratsaldeko 19:30ean Easo Plazatik abiatuko gara. Parte-hartzera animatzen zaituztegu!
