LAB sindikatuak Eusko Jaurlaritzari eta Bizkaiko Aldundiari gutuna bidali die, baita Bilboko Udalari eta Enplegu Sailburua den Angel Toña jaunari ere, laster egingo den lizitazioan dagozkion klausulak sar ditzatela eskatuz, subrogazioa eta MANPOWER GROUP SOLUTIONS enpresan diharduten orientatzaileen, hezitzaileen eta azpikontratatutako laguntzaileen egonkortasuna eta enplegu kalitatea berma daitezen.

Guggenheim Bilbao Museoa osatzen duten pertsonen iritziz beharrezkoa da, hurrengo lizitazioen harira, Hezkuntza eta Interpretazio Zuzendariordetzari nahiz Guggenheim Museo Fundazioaren Patronatuari jakinaraztea egun jasaten ari diren baldintza kaskarrean lan egin beharrak sortu duen ezinegon orokortua eta haien lan baldintzak hobetu eta bermatuko dituzten akordioak lotzeko beharra.

Museoak urteak daramatza zerbitzuak kanpoko enpresen bidez eskaintzen (gure lantaldearen zeregina duela lau urte externalizatu zen). Horrek hainbat ondorio ekarri ditu berekin. Erakundeak zein enpresa publikoak edota pribatuak, behin zerbitzua kanpora eramanda, langile horietaz ahaztu ohi dira.
Arazoak daudenean eskuak garbitzen dituzte, eta behin eta berriz desbideratzen dituzte haien arazoak azpikontratetara. Azpikontratazioak lan baldintzak kaskartzea dakar; prekarietatea areagotu egin da lan erreformarekin.

Enpleguaren egonkortasuna galduz, kontratak izan dezakeen iraunaldiak baldintzatzen gaitu, eta krisialdiaren eraginez erakundetan ematen ari diren murrizketekin, lanpostuak suntsitzen eta murrizten dira azpikontratetan.

Lizentziaturako titulazioa, hizkuntzak, esperientzia, balio-aniztasuna eta ordu-prestasuna eskatzen zaion talde batez ari garela kontuan hartuz, beharrezkoa da zerbitzua baldintza duinez hornitzeko neurriak hartzea.

Zerbitzua egiten duen enpresarekin lan baldintzak itundu behar badira ere, uste dugu ere, museoak eta bere Patronatuak, haren esleipen pleguetan, ezarri behar dituela bete behar diren gutxiengoak eta laster egingo diren lizitazioan, dagokion partida ekonomikoaz hornitu beharko dituela.

Honen helburua, museoak eskaintzen duen zerbitzuaren kalitatea nahiz zerbitzua eskaintzen duen enpresan ematen diren lan baldintzak hobetzea izango da. Hortaz, beharrezkoa deritzogu gaur egun jasaten dugun prekarietate egoerari aurre egingo dizkioten ekimenak ekiteari.

Azken hilabeteotan ezagunak eta agerikoak dira honelako egoeretan ematen diren jarrera geldoek dakartzaten zorigaiztoko ondorioak. Horregatik hau bidaltzen eta idazten dizuegunon ardura publikora eta instituzionalera eta “Euskal Herriko ekonomiaren berpizkundearen kultur ikurra” (haren estatutuetako 5. artikulua) izan nahi duen horrengan jotzen dugu, ez dadin bere langileen lan baldintzen prekarietatean oinarritu, baizik eta kalitateko enpleguaren defentsan, haren langileen onarpenean eta lan baldintzak duintzean; horrek guztiak, zalantzarik gabe, zerbitzua hobea ekarriko du eta museoak duen irudia, Euskal Herrian zein atzerrian, hobetuko du.