Langileei lekualdatzea jakinarazi zitzaienetik, LABen larritzat jo genituen gertakariak. Movistar-Elecnorreko langileek primeran ulertu zuten Zuzendaritzak hartutako neurria langile guztiei eragiten zien oinarrizko eskubideen kontrako erasoa zela. Eta salaketarako antolatutako lanuzte eta mobilizazioetan modu aktiboan hartu zuten parte.

Ez zen soilik generoagatiko diskriminazioa, bizitza familiar eta lanekoaren arteko uzterketari dagozkion lan eskubideen urraketa ere hor zegoen. Gainera, zigortu egin zituzten zaintza legalagatik jardunaldi murrizketan zeuden langileak.

Gatazka kalera atera dugu eta Arabako jenderteari telekomunikazioko enpresa honen portaera matxista eta diskriminatorioa jakinarazi diogu. Enpresak dirutzak gastatzen ditu bere irudia hobetzen eta horrelako praktikak egiten ditu etxe barruan.

Zoritxarrez, jarduera hau ez da zerbait isolatua. Enpresa gehienetan ematen dira honelakoak eta zeharo zailtzen dute langileen eskubidea euren familia-bizitza eta lanekoa uztartu ahal izateko.

Ez da lortu lekualdatze agindua bertan behera uztea eta lanpostuei eustea. Hala ere, LABek errespetatu egiten du langileen erabakia, hauek onartu egin baitute enpresaren azken eskaintza lan harremanarekin amaitzeko. Zuzendaritzak berak baldintzatu du erabaki hau. Mugaraino eraman ditu langileak, eurei eta euren familiei kalterik gutxien ekartzen zien proposamena onartzera behartuta ikusi dute euren burua, enpresan jarraitzekotan aurki lezaketen giro txarra kontuan izanda.

Azkenik, langileak zoriondu nahi ditugu euren portaera tinko eta borrokalariarengatik, ELECNOReko langileei, mobilizatzeagatik, eta Arabako jendarteari, injustizia honekiko elkartasuna adierazi duelako.

Horrelako portaerak salatuz soilik lortuko dugu horrelakoak desagertu eta lan harreman humano eta bidezkoagoak lortzea.