LAB beti egon da negoziazio kolektiborako euskal esparrua blindatzearen alde eta akordio intersektorial bat erdiesteko egondako bi negoziazioetan parte hartu du. Orain arte CONFEBASK izan da horrelako akordio bat ekidin duena. Gogoratu behar da 2013an ezezkoa eman ziola horrelako egitura akordio bati.
Gaurko batzarrean, beste behin, agerian geratu da mekanismo bat beharrezkoa dela patronal bakoitzaren ordezkaritza zehatza ezagutzeko. Hain zuzen ere, Garen eta Confebasken artean lehia egon da mahaian esertzeko eskubidea nork zuen jakiteko eta bakoitzak izan beharreko ordezkaritzaren inguruan. Bada garaia, hauteskunde sindikaletan sindikatuen ordezkaritza neurtzen den moduan, patronalaren ordezkaritza neurtzeko mekanismoak sortzea honelako arazoak ekiditeko.
LABek bere aldetik, mahaia osatu ostean, honelako akordio batek kontuan hartu beharko lituzkeen puntuak azaladu ditu. Hala nola estatuko hitzarmenen aurrean bertako hitzarmenak babestea izan behar du helburu, negoziazio kolektiboa blokeo egoeragatik atera eta ultraktibitatea galdu ostean indarrean ez dauden hitzarmenen egoerari heldu behar dio, etorkizunean ultraktibitatea galduko duten hitzarmenak nola babestu aztertu beharko da eta negoziazio kolektiboaren desblokeoa erdigunera ekarri behar du. Hau horrela izan dadin proposamen zehatzak jarriko ditugu mahai gainean.