Iruñeko Electroaceros enpresako ia langile guztiek bat egin dute gaur LAB eta ELA sindikatuek greba mugagaberako egindako deialdiarekin, langileek bizi duten egoera salatzeko eta enpresaren gerentziari irtenbide duina eskatzeko; izan ere, badirudi jabeek lantegia behin betiko itxi nahi dutela. Gaur 13:00etan langileek elkarretaratzea egin dute lantokiaren aitzinean, eta horrela eginen dute heldu diren egunetan ere.

Electroaceros enpresak 37 langile ditu, gehienak 50 urtetik gorakoak, eta bizitza osoa daramate enpresan lanean. Urte hauetan guztietan, enpresa honek aurrera egin badu,  hori izan da neurri handi batean haietako bakoitzaren ahaleginagatik eta dedikazioagatik.

Enpresa Iruñeko familia ezagun batek kudeatzen du, Astibia familiak. Kudeaketa horrek gorabeherak izan ditu, baina LABetik (2 delegatu) zein ELAtik (1), langileen ordezkari gisa, salatu nahi dugu azken urteetako kudeaketa negargarria izan dela.

Azken urteetan langileen ordezkaritza sindikalak behin eta berriz eskatu dio enpresari mahai baten bueltan esertzeko, lantegiaren zein langileen etorkizunaz hitz egiteko. Baina hori egin beharrean, kudeatzaileek enpresa hiltzen utzi dute. Beraien irtenbide bakarra langileak erasotzea izan da, galerak transmititzen zizkieten bitartean, ABEEE aldi baterako enplegu erregulazio espediente ekonomiko bat aplikatzen saiatu ziren -kontsulta-aldian atzera bota behar izan zutena- eta hortik gutxira soldatak nabarmenki jaisten zien funtsezko aldaketa bat aplikatzen saiatu ziren, baina langileen batasun eta borrokarekin atzera bota zen. Eta hori guztia gertatzen zen bitartean, familiak une horretan fabrika zuzentzeko jarritako bazkidea urtean 80.000 euro baino gehiago kobratzen ari zen; eta hori gutxi balitz bezala, Astibia familiak enpresaren bitartez bere lokal batean edukitzeagaitik 75.000 euroko auto alokairu bat kobratzen zuen.

Egoera honaino iritsita, azkenengo bost nominak atzerapenarekin kobratu dituztenez eta azkena oraindik kobratu ez dutenez, langileek greba mugagabea hastea erabaki dute, pairatzen ari diren egoerari irtenbide duin bat emateko.