MERCEDES-BENZek iragarri du berriki diesel aferaren kontura, eta eskaera jaitsiera argudiatuta, enpresa 10 egunez itxiko duela eta azaroaren 12tik aurrera gaueko txanda bertan behera utziko duela. Horretaz gain, zenbait langile ebentual kaleratzen hasi da eta hurrengo hilabeteetan, ehunka izan daitezke kaleratuak.
LABek irmoki exijitzen dio MERCEDESi kaleratzeak bertan behera uztea. Oraingoan dieselaren aitzakia jarri dute, baina egia dena da asko eta asko kaleratu ditzakeela epe legalera ailegatzen direlako, eta beraz kontratu mugagabea egin beharko ziela.
Aldi berean, UGT, CCOO, EKINTZA eta PIMek oparitutako neurri gabeko malgutasunari heldu dio enpresak, langile guztien kaltetan. Ildo horretatik ordea, gogorarazi nahi dugu MERCEDESek duela aste gutxi gaueko txanda ordu erdiz luzatu zuela eta lan erritmoa %107’6koa dela, langileon osasunean ondorio kaltegarriak izanda. Aitzakia hutsa da beraz, ebentualekin berriro jolasteko eta malgutasuna era neurrigabean aplikatzeko.
LABek bitarteko guztiekin egingo die aurre neurri hauei guztiei eta dei egiten diegu beste sindikatuei elkarrekin mobilizatzera enplegu eta lan baldintza duinen defentsan. Ez dugu onartuko diesel aferaren biktimak langileok izatea.